Германияның Мангейм қаласында бір топ адамды көлік басып кетті
АСТАНА. KAZINFORM — Жергілікті журналистер оқиға орнында брезентпен жабылған кем дегенде бір адамның денесі байқалғанын айтады, деп хабарлайды Kazinform агенттігінің меншікті тілшісі.
Көліктің соқтығысуы салдарынан кем дегенде бір адам қайтыс болды. Тағы 25-і жарақат алды, олардың 15-інің жағдайы ауыр, дейді жергілікті БАҚ. Reuters агенттігі куәгерлерге сілтеме жасай отырып, оқыс оқиға болған жерде бірнеше адам жатқанын хабарлады. Сол сәтте зардап шеккен екі адамға реанимациялық шаралар жүргізіліп жатқаны да айтылды.
Сонымен қатар, полиция қала орталығында ауқымды операция жүргізіп жатқаны белгілі болды. Құқық қорғау органдарының мәліметінше, оқыс оқиға карнавал шеруі өтіп жатқан қаланың орталық алаңында болған. Полиция қала тұрғындарын Мангейм орталығынан аулақ болуға және үйлерінен шықпауға шақырады. Себебі аталмыш жағдай «өмірге қауіп төндіретін» деп бағаланады.
Бұл ретте полиция өкілі «тергеу жедел қарқынмен жүргізіліп жатқанын» хабарлады. Алайда, ақпарат жария етілген кезде ықтимал қылмыскерге қатысты қандай да бір деректер айтылмады.
Дегенмен Bild мәліметі бойынша көлік жүргізушісі ұсталды. Баден-Вюртемберг ішкі істер министрі DPA-ға берген сұхбатында күдікті Рейнланд-Пфальц тумасы, 40 жастағы неміс азаматы екенін нақтылаған.
Дегенмен, күдікті ұсталса да, қала орталығындағы барлық жол жабылды. Орталықтан тыс барлық жол мен көпірлерде автомат асынған полицейлер құжат тексеруге кірісті. Басылым ұсынған ақпаратқа сәйкес Мангейме аспанында тікұшақтар қалаға шолу жасап жүр.
Мангейм Баден-Вюртемберг федералды штатының солтүстігінде Гессен және Рейнланд-Пфальц шекарасында орналасқан. Қалада шамамен 320 мың адам тұрады — бұл Баден-Вюртембергтегі екінші үлкен қала.
Еске салсақ, соңғы апталарда Германияда осыған ұқсас бірнеше шабуыл болды. 2024 жылдың желтоқсанында Магдебургте Сауд Арабиясының тумасы, 50 жастағы психиатр Рождестволық базар қонақтарын көлікпен басып өтіп, салдарынан алты адам қайтыс болды. Ақпан айының ортасында 24 жастағы ауған босқыны өз көлігімен Мюнхендегі демонстранттар тобын қағып кетті. Оқиға орнында жас әйел мен бала тіл тартпай кетті.
