Голан жотасына баратын қазақстандық бітімгерлер арасында мерзімді қызмет әскері жоқ - министр
АСТАНА. KAZINFORM – Қорғаныс министрі Руслан Жақсылықов Голан биігіне жіберілетін қазақстандық бітімгерлер арасында мерзімді қызмет әскері жоқ екенін айтты.
«Бітімгерлік бөлімшелерде мерзімді қызмет әскерлері жоқ. Сәйкесінше, ол құрамда кәсіби әскерилер ғана бар. Бұл – келісімшарт бойынша қызмет етіп жүрген әскерилер мен офицерлік құрам. Келісімшарт бойынша қызмет ететін әскерилердің орташа жасы 25, 27, 30 жас», - деді министр.
Оның айтуынша, аталған контингент сақтандыру шараларымен де қамсыздандырылған.
«Қорғаныс туралы заңға сәйкес, Қарулы Күштерге келіп, келісімшарт жасаған әрбір әскери қызметшіні мемлекет сақтандырады», - деді Руслан Жақсылықов.
Айта кетейік, Парламент қазақстандық әскерилердің БҰҰ миссияларына қатысу туралы Жолдауын мақұлдады.
