Голан жоталарынан оралған қазақстандық бітімгерлер қызметін қайда жалғастырады
АСТАНА. KAZINFORM – Бітімгерлік миссиядан оралған қазақстандық әскерилердің әлеуеті қалай пайдаланылады? Бұл сұраққа ҚР Қорғаныс министрінің тәрбие және идеологиялық жұмыстар жөніндегі орынбасары Шайх-Хасан Жазықбаев айтты.
- Қазақстан Қарулы Күштері жауынгерлік аумақта болған тәжірибелі әрбір әскери қызметшіні өте жоғары бағалайды. Осы миссия (Голан жоталарындағы бітімгерлер) аяқталғаннан кейін, әр жауынгер өзінің жергілікті қызмет орнына, яғни әскери бөліміне оралады, - деді Шайх-Хасан Жазықбаев Мәжілістің жалпы отырысында депутаттар сұрағына жауап бере отырып.
Оның айтуынша, жоғары мансаптағы қызметке тағайындау кезінде жауынгерлік даярлығы жоғары және тәжірибелі осы әскери қызметшілерге басымдық беріледі.
Сонымен қатар Қазақстанның бітімгерлеріне қанша өтемақы қарастырылғаны туралы жазған болатынбыз.
Еске салсақ, 2024 жылы наурыз айында қазақстандық бітімгерлерді Голан биігіне шығарып салу рәсімі өтті.
Жақында Голан жоталарындағы қазақстандық бітімгерлер медальмен марапатталды.
