Google термоядролық энергияға инвестиция салады

АСТАНА. KAZINFORM — Google жеке Commonwealth Fusion Systems (CFS) компаниясымен термоядролық синтез саласында серіктестік туралы жариялады, деп хабарлайды Кazinform агенттігінің меншікті тілшісі NBC News-ке сілтеме жасап.

Бұл – технологиялық алпауыттың CFS-тен 200 мегаватт таза термоядролық энергияны сатып алу жөніндегі алғашқы коммерциялық келісімі. Ол Вирджиния штатының Честерфилд округінде әлемдегі алғашқы ARC (қолжетімді, сенімді, ыңғайлы) желілік термоядролық электр станциясын жүзеге асырады.

2021 жылдан бері CFS-ке инвестиция салған Google Массачусетс штатының Девенс қаласында орналасқан компаниядағы үлесін арттырғанын айтты. Алайда, екі компания да қаржылық шарттарды жарияламайды.

ARC 2030 жылдардың басында 400 мегаватт таза, көміртексіз энергия өндіреді деп жоспарланған. Бұл ірі өндірістік нысандарды немесе шамамен 150 мың үйді қуаттандыруға жеткілікті. Келісім сонымен қатар Google-ге қосымша ARC қондырғыларынан электр қуатын сатып алуға мүмкіндік береді.

Термоядролық синтез – жеңіл атом ядролары Цельсий бойынша 100 миллион градустан жоғары температураға дейін қызатын процесс. Мұндай температурада отын плазмаға айналады, нәтижесінде ядролар бірігіп, энергияның едәуір мөлшерін шығарады. Содан кейін энергия көміртегі шығарындыларынсыз электр энергиясын жасау үшін алынады.

Осы айда Google Калифорниядағы TAE Technologies термоядролық энергетикалық компаниясын қаржыландыруды жалғастыратынын жариялады.

Айта кетейік, қазақстандық кәсіпкерлер Bloomberg, Google және Meta кеңсесінде болды.