Grand Slam турнирі: Дәурен Сүюкенов Қазақстан қоржынына екінші қола жүлдені салды

АСТАНА. KAZINFORM - Қазақстандық дзюдошы Дәурен Сүюкенов Әбу-Дабиде (БАӘ) өтіп жатқан Grand Slam турнирінің қола жүлдесін жеңіп алды.

Дәурен 60 келіге дейінгі салмақта отандасы Мағжан Шамшадинмен үздік үштікке ілігу үшін күресті.

Жарысты сәтті бастаған М.Шамшадин жартылай финалда франциялық Седрик Риволге есе жіберсе, Д.Сүюкенов жұбаныш белдесуінде өзбекстандық Камолиддин Бахтиеровті жолдан тайдырған еді.

Қола жүлде үшін бәсекеде М.Шамшадинге үш ескерту беріліп, Дәурен жеңіске жетті.

Осылайша, Grand Slam додасының алғашқы күні Қазақстан қоржынына қос қола медаль түсті.

Еске сала кетейік, бұдан бұрын Әбиба Әбужақынованың Grand Slam турнирінің қола жүлдегері атанғанын жазған болатынбыз.