Гренландияда тұрып қалған кеме жолаушыларынан коронавирус табылды
Гренландияда қайырға тұрып қалған круиз кемесінің бортындағы үш жолаушыдан коронавирус инфекциясы анықталды, деп хабарлайды ҚазАқпарат CNN-ге сілтеме жасап.
Бортында 206 жолаушы мен экипаж мүшелері бар Ocean Explorer кемесі осы аптаның басында Гренландияның шалғай жерінде қалып қойды және бірнеше күн бойы сол жерде тұрып қалуы мүмкін.
Aurora Expeditions кемесі операторының айтуынша, вирус жұқтырған жолаушылар қазір оқшауланған, ал қалғандарының жағдайы жақсы және олардың денсаулығына еш қауіп төніп тұрған жоқ.
Оқиғадан кейін жақын маңдағы «Кнуд Расмуссен» деп аталатын тексеру кемесі көмекке жіберілді, бірақ оған жету үшін шамамен 2 222 шақырым жол жүруге тура келеді.
Кеме Ocean Explorer-ге жұма күні кешке жетуі тиіс.
Сәрсенбі күні жоғары толқын кезінде Гренландия үкіметіне тиесілі балық аулайтын «Тараджок» зерттеу кемесі круиз лайнерін шығарып алуға әрекет етіп көргенімен, орнынан қозғалта алмады.
Aurora Expeditions ресми сайтының хабарлауынша, кеме «әлемнің ең шалғай жерлеріне экспедициялық саяхат жасау үшін арнайы жасалған».
