Грузия экономикасы өткен жыл айтарлықтай өсті – Дүниежүзілік банк
ТБИЛИСИ. ҚазАқпарат – Грузия экономикасында өсу көрсеткіштері байқалуда. Бұл туралы Дүниежүзілік банктің (ДБ) «Жаһандық экономикалық перспективалар» жаңа баяндамасында айтылған, деп хабарлайды ҚазАқпарат тілшісі Georgia Today агенттігіне сілтеме жасап.
«COVID-19 пандемиясынан кейін ішкі сұраныстың қалпына келуі, туризмнің жандануы және Ресейден ақша аударымдарының артуы Грузияның экономикалық өсуіне айтарлықтай ықпал етті. Соңғы бағалау бойынша, 2022 жылы ол 10%-ды құрады», - делінген ДБ баяндамасында.
Алайда құжатқа сәйкес, Грузияда экономикалық өсім 2023 жылы 10 пайыздан 4 пайызға дейін төмендейді деп күтілуде. Бұл экономикалық серіктес елдердегі (ЕО елдері) өсу көрсеткішінің баяулауымен және келетін ақша ағынының азаюымен байланысты.
Банк ақпаратында жаһандық экономикалық өсімнің 2023 жылы 1,7%, ал 2024 жылы 2,7% болатына көрсетілген.
Автор: Серікбол Қошмағанбетов
