Хакерлер Франциядағы қан қорын жойып жібере жаздады
АСТАНА. KAZINFORM — Францияда хакерлер Француз қан қызметінің (EFS) қоймаларындағы салқындату жүйелеріне шабуыл жасап, биологиялық материалдар сақталған орындардағы температураны қашықтан Цельсий бойынша 110 градусқа дейін көтеруге тырысқан, деп хабарлайды Kazinform агенттігі Anadolu агенттігіне сілтеме жасап.
Француз БАҚ-тарының мәліметінше, кибершабуыл Бургундия — Франш-Конте аймағында болған.
Қаскөйлер Француз қан қызметінің контейнерлеріне қызмет көрсететін Coolworld компаниясының салқындату жүйесіне қол жеткізіп, бірнеше қоймадағы температура параметрлерін минус 30 градустан плюс 110 градусқа дейін өзгерткен.
Алайда техник температураның қалыптан тыс көтерілгенін дер кезінде байқап, ауыр зардаптардың алдын алған.
Францияның Денсаулық сақтау министрлігі бұл оқиға мекеменің жұмысына әсер етпегенін хабарлады.
Француз қан қызметінің басшысы Фредерик Пакуд сақтаулы материалдардың қауіпсіздігіне нұқсан келмегенін растады. Сонымен қатар шабуыл салдарынан науқастарды емдеуге арналған үлгілер мен қан плазмасының қорын жоғалту қаупі болғанын атап өтті.
Кибершабуылды ұйымдастырушылардың кім екені әзірге анықталған жоқ.
Бұған дейін неміс тіліндегі Charité университеттік клиникасының серверіне хакерлер шабуыл жасап, жеке байланыс деректеріне қол жеткізгенін жазғанбыз.
Сонымен қатар Жапонияның GMO Internet Group интернет-провайдері валюта саудасы қызметіне заңсыз кірген хакерлерді анықтауға көмектесетін ақпарат үшін 1 млн долларға дейін сыйақы беретінін мәлімдеді.
