«Халық банк» Павлодардағы бөлімшесінің тоналуы туралы: Ішкі шаралар атқарылып жатыр

АСТАНА. KAZINFORM — «Қазақстан Халық банкі» акционерлік қоғамының баспасөз қызметі Павлодар қаласындағы бөлімшесіне ұры түсу фактісі бойынша жүріп жатқан тергеу туралы пікір білдірді.

«Тергеудің барысы мен келген шығынның алдын ала мәліметін тергеу мүддесіне орай аша алмаймыз. Банк тергеу жүргізушілермен барынша тығыз әрекетте жұмыс істеп жатыр және өз клиенттерімен тікелей байланыста. Осы жағдай бойынша банк қызметкерлері тиісті тәртіп бойынша бүкіл қажетті ішкі шараларды атқарып жатыр», — деп жазылған мәліметте.

«Халық банк» өкілдері нақтылау сұрағына берген жауабында мұндағы «ішкі шаралар» деген оралымды ұрлық фактісінен келген шығындарды есептеу жұмыстары деп түсіндірді. 

Бұған дейін Қаржы нарығын реттеу және дамыту агенттігі де «Халық банк» бөлімшесіндегі тым түсініксіз ұрлық фактісі туралы пікір білдіріп, тергеу қорытындысы бойынша ден қоюға дайын екендерін айтқан. 

Еске салсақ, 11 қараша күні Павлодар қаласындағы «Халық банк» бөлімшесінің ғимаратын полиция қоршауға алған болатын.