Халықаралық валюта қоры Орталық Азия мен Кавказ аймағының дамуына қатысты болжамын жариялады

АЛМАТЫ. ҚазАқпарат - Халықаралық валюта қоры Орталық Азия мен Кавказ аймағы елдерінің экономикалық дамуына қатысты болжамын жариялады. Болжамға сәйкес Орталық Азия мен Кавказ аймағы елдерінің экономикалық белсенділігі биржалық тауарларға бағаның төмендеуінен баяулай түспек. Сондай-ақ оған Ресей экономикасы өсімі бәсеңдеуінің екінші кезеңі де ықпал етеді.

Есепті ХВҚ Таяу Шығыс және Орталық Азия елдері аймақтық департаментінің директоры Юха Кяхконен жариялады. «Биыл аймақта өсім 3,4 пайызды құрайды деп болжанып отыр. Сондай-ақ валюта бағамының төмендеуінен де аймақта инфляциялық қысым көтеріліп келеді. Инфляция 7 пайызға дейін жетуі ғажап емес. Ресей экономикасын қысымдау ақша аударымдарын, экспорт пен тікелей инвестициялардың ағынын тежейді», - деді Ю.Кяхконен. Сарапшылардың пайымдауынша, мұнай бағасының құлдырауына қарамастан, Ресейдегі экономикалық құлдырау уақытша сипат алуы ықтимал. Орталық Азия мен Кавказ аймағының бірқатар елдері қысқа мерзімде экономикаларын көтеру үшін резервтегі қорларын пайдаланады. «Капиталды шығындар мен ағымдағы шығындарды қысқарту, салық жеңілдіктерін жою, мемлекеттік табысты басқару жүйесін жетілдіру резервті толықтыруға мүмкіндік беріп, инфрақұрылымға қажет инвестицияның көлемін арттыруға көмектеседі», - делінген есепте. Сондай-ақ сарапшылардың айтуынша, құрылымдық реформалар жүргізу мен ішкі саладағы бәсекелестікті арттыру аймақтың экономикасының өсуіне жағдай жасайды.