Харбинде қысқы Азия ойындарының алауы жағылды
ХАРБИН.KAZINFORM – Қытайдың Харбин қаласында өтіп жатқан IX қысқы Азия ойындарының бас алауы жағылды.
Салтанатты ашылу рәсімі Харбин халықаралық конференция, көрме және спорт орталығында өтті. 80 минутқа созылған шара үш бөлікке бөлініп, қар-мұз спортының рухани байлығынан сыр шертті.
Екінші бөлікте, спортшылардың стадионға кіру рәсімі мен ту шығару рәсімі шамамен 50 минутқа созылады.
Соңында қысқы Азия ойындарының бас алауы Харбин қар-мұз әлемі қалашығында жағылды.
Салтанатты шараға Қытай Халық Республикасының төрағасы Си Цзиньпин, Қырғызстан президенті Садыр Жапаров, Пәкістан президенті Асиф Али Зардари, Таиланд премьер-министрі Пхетхонгтхан Чинават,Корея Ұлттық ассамблея спикері У Вон Сик, Халықаралық Олимпиада комитетінің (ХОК) президенті Томас Бах және Азия Олимпиадалық кеңесінің (АОК) бірінші вице-президенті Тимоти Фолк Янг-Тинг қатысты.
Осыған дейін хабарлағанымыздай, Қазақстан делегациясы алаңға 12- болып кірді. хоккейші Әділ Бекетаев және шорт-трекші Ольга Тихонова Қазақстан құрамасының туын ұстап шықты.
Айта кетейік, Қысқы Азиадаға Қазақстаннан 137 спортшы қатысады. Жарыстар Харбин қаласында және Ябули тау шаңғы курортында өтеді.
Сондай-ақ, додаға Азияның 34 елінен/аймақтарынан барлығы 1275 спортшы (755 ер, 520 әйел) қатысып, рекордтық көрсеткішке жетті.
