ХҒС-қа ұшырылатын Александр Скворцовтың экипажы бекітілді

БАЙҚОҢЫР. ҚазАқпарат - Байқоңыр ғарыш айлағында Ресейғарыш басшысы Олег Остапенконың басшылығымен ұшырылатын ғарыш апппараттары кешендерінің жазғы сынақтарын өткізу жөніндегі мемлекеттік комиссияның отырысы болды.

Мемлекеттік комиссия мүшелері - Ресейғарыш кәсіпорындарының басшылары, НАСА, Байқоңыр қаласы әкімшілігінің өкілдері, «Байқоңыр» кешеніндегі ҚР Президентінің өкілдігі «Союз ТМА-12М» тасымалдаушы басқарылатын кемесінің негізгі және қосалқы экипаждарын ұшыруға әзірлеу қорытындыларын қарады.

Мемлекеттік комиссияның шешімі негізінде «Союз ТМА-12М» кемесімен ғарышқа ұшыруға құрамында: кеме командирі Александр Скворцов, (Ресейғарыш), бортинженер-1 Олег Артемьев (Ресейғарыш), бортинженер-2 Свонсон Стивен Рей (НАСА) бар негізгі экипаж бекітілді.

Олардың қосалқы экипажына «Союз ТМА-12М» тасымалдаушы басқарылатын кемесінің командирі Александр Самокутяев (Ресейғарыш), бортинженер-1 Елена Серова (Ресейғарыш), бортинженер-2 Уилмор Барри Юджин (НАСА) бекітілді.

Қазақстандықтар атынан экипаждарды ҚР Президентінің «Байқоңыр» кешеніндегі арнайы өкілі Рзақұл Нұртаев құттықтап, ғарышкерлер мен астронавтарға ойдағыдай ұшуға және қазақ жеріне аман-есен оралуларына тілектестік білдірді.

«Союз ТМА-12М» тасымалдаушы басқарылатын кемесімен «Союз-ФГ» зымыран-тасығышын Халықаралық ғарыш стансасына ұшыру 26 наурызға, Астана уақытымен 03 сағат 17 минутқа жоспарланған.