«Хитроу» әуежайындағы өрт: Air Astana Лондонға рейстерді кейінге шегерді
АСТАНА. KAZINFORM — Бұл Хитроу әуежайының уақытша жабылуына себеп болған ауқымды электр қуатының істен шығуымен байланысты. Бұл туралы Air Astana баспасөз қызметі хабарлады.
— Air Astana әуекомпаниясы Алматы-Лондон және Лондон-Алматы бағыттарындағы KC663/664 рейстер 21 наурыздан 22 наурызға шегерілгенін хабарлайды. Рейстің кешіктірілуіне электр подстанциясындағы өрт салдарынан Хитроу әуежайында электр құрылғыларының істен шығуы себеп болды, — делінген хабарламада.
Рейс статусын әуекомпания сайтында тексеріп отыруға болады.
Айта кетелік Лондондағы ең ірі әуежай өрт салдарынан бір тәулікке жабылған еді.
BBC мәліметінше, Лондон өрт қызметі жергілікті уақыт бойынша таңғы сағат 9:00–де Хейс қаласындағы қосалқы стансадағы өрттің «бақылауға алынғанын» хабарлады. Өртті сөндіруге 70-ке жуық өрт сөндіруші жұмылдырылған. Өрт қызметінің хабарлауынша, қосалқы стансадағы трансформатор жанған.
