ХОК-тің уақытша мойындауы бізде спорт дұрыс бағытта дамып жатқанын көрсетеді – Головкин

АСТАНА. KAZINFORM —  26 ақпанда Халықаралық Олимпиадалық комитеті (ХОК) World Boxing халықаралық федерациясын уақытша мойындағанын ресми түрде жариялады.

 Бұл шешімге Қазақстан Ұлттық Олимпиадалық комитетінің президенті, World Boxing Олимпиадалық комиссиясының төрағасы Геннадий Головкин пікір білдірді.

ХОК-тің уақытша мойындауы – маңызды жетістік және біздің спорттың дұрыс жолда екенін көрсетеді. Бұл шешім бізді басты мақсатымыз – боксты Олимпиада ойындарында сақтау жолында тағы бір қадам алға жылжытады. Мен World Boxing-ті қолдайтын барлық адамдардың үздіксіз еңбегінің арқасында осындай нәтижеге қол жеткізгенімізге қуаныштымын. Болашақ спортшылар мен болашақ чемпиондар үшін біздің ортақ мақсатымыз – адалдық пен бейтараптық қағидаттарына негізделген Халықаралық федерация құру. Барлық мақсаттарымызға жету үшін әлі де көп жұмыс істеуіміз керек, сондықтан біз осы жетістігімізбен шектелмейміз, - деді ол. 

Айта кетелік Халықаралық Олимпиадалық комитетінің Атқарушы кеңесі қашықтан өткен отырыста World Boxing Халықаралық федерациясын уақытша мойындаған еді.