Хоккей: «Барыс» «Авангардтан» жеңіліп қалды
АСТАНА. ҚазАқпарат – «Барыс» Құрлықтық хоккей лигасындағы кезекті ойынын бүгін елордада «Авангард» (Омбы) командасына қарсы өткізді, деп хабарлайды ҚазАқпарат тілшісі.
Елордалық клуб кейінгі ойындарды жақсы өткізіп келеді. Соңғы алты кездесудің төртеуінде жеңіске жетті. Осылайша турнир кестесінде плей-офф сатысына қатысуға мүмкіндік алатын он алты команданың қатарына қосылып отыр.
Екі команда биылғы турнирде үш мәрте кездесіп үлгерді. Оның екеуінде ресейлік клубтың мерейі үстем болды. Сондай-ақ, соңғы екі ойында «Авангард» жеңіске жетіп келеді. Сондықтан «Барыс» олардан есе қайтаруға тырысты.
Кездесу барысында командалар бір-бірінің қақпасынан саңылау табуға тырысты. Бір-бірінің қақпасы маңында жиі бой көрсетті.
Ойынның 15-минутында елордалық клубтан Аркадий Шестаков есеп ашты. Оған ресейлік клубтан Дамир Шарипзянов 19, Алекс Бродхерст 27-минутта екі шайбамен жауап қайырды. Ал 59-минутта Сергей Толчинский бос қақпаға гол соғып, ресейоік клубқа жеңіс сыйлады.
Осылайша елордалық клуб қарсыласына 1:3 есебімен есе жіберді.
Енді «Барыс» алдағы ойынын 24 желтоқсанда елордада Ресейдің «Автомобилист» (Екатеринбург) командасына қарсы өткізеді.
Фото: sports.kz
