Хоккей: «Барыс» «Cибирь» командасынан жеңіліп қалды
Екі команда турнир кестесінде қатарлас тұр. Олардың плей-офф кезеңіне шығуына мүмкіндігі бар. Бүгін жеңіске жеткен жағдайда «Барыс» жағдайын одан әрі жақсартса, «Cибирь» плей-оффқа шығатын 16 команданың қатарына қосылуға мүмкіндік алатын.
Кездесу барысында елордалық хоккейшілер ойынды жақсы бастады. Алғашқы болып есеп ашты. Ойынның 3-минутында Мэтт Фрэттин мергендік танытты.
Екінші кезеңде ресейлік команда таразы басын теңестіріп кетті. Оны 31-минутта Ефрим Гуркин өзінің еншісіне жазды.
Үшінші кезең бастала салысымен «Cибирь» есепті ұлғайта түсті. Бұл жолы 40-1-минутта Дмитрий Саюстов қақпадан мүлт кеткен жоқ. Ойынның бітуіне 15 секунд қалғанда ресейлік клуб сапынан Микаэль Руохомаа жеңіс шйбасын соғып кетті.
Осылайша «Барыс» қарсыласынан 1:3 есебімен жеңіліп қалды. Қазақстандық клуб биыл «Cибирь» клубына екінші мәрте есе жіберіп отыр.
Бұдан бұрын 26 қазанда Новосібірде өткен ойында оларға 1:3 есебімен жеңілді.
Енді елордалық клуб 30 желтоқсанда елордада Ресейдің «Автомобилист» (Екатеринбург) командасын қабылдайды.
Естеріңізге сала кетелік, бұдан бұрын «Барыс» он ойынның тоғызында жеңіске жеткен болатын.