Хоккей: «Барыс» «Нефтехимик» командасынан басым түсті
АСТАНА. ҚазАқпарат - «Барыс» Құрлықтық хоккей лигасындағы кезекті ойынын бүгін Ресейде «Нефтехимик» (Нижнекамск) командасына қарсы өткізді, деп хабарлайды ҚазАқпарат тілшісі.
Кездесу барысында екі команда ойын басынан гол соғатын мүмкіндікті іздеді. Десе де олар діттеген мақсатына жете алмай жатты. Алғашқы кезеңде командалар бір-бірінің қақпасынан саңылау таба алған жоқ.
Екінші кезеңнің 32-минутында «Нефтехимик» хоккейшісі Аксель Галимов өз командасын алға шығарды. Бұдан кейін таблодағы есепті өзгертетін бірнеше мүмкіндік болған еді.
Үшінші кезеңнің 41-минутында «Барыс» сапынан Майкл Шапю таразы басын теңестірсе, 53-минутта Джереми Бракко қазақстандық команданы алға шығарды.
Ал Майкл Шапю 59-минутта бос қақпаға жеңіс шайбасын соқты.
Осылайша «Барыс» қарсыласынан 3:1 есебімен басым түсті.
«Барыс» ендігі ойынын 21 желтоқсанда елордада Ресейдің «Авангард» (Омбы) командасына қарсы өткізеді.
Еске салсақ, бұдан бұрын елордалық клуб буллитте «Ак Барс» командасынан басым түсті.
