Хоккей: Қазақстан қыздары Оңтүстік Кореямен кездесті
НҰР-СҰЛТАН. ҚазАқпарат - Қытай астанасы - Бейжің қаласында шайбалы хоккейден қыздар арасында Әлем чемпионатының бірінші дивизионы В тобындағы төртінші тур ойындары өтті. Қазақстан құрамасы Оңтүстік Кореямен кездесті, деп хабарлайды ҚазАқпарат тілшісі.
Аталмыш додада Қазақстан құрамасы сәтсіз ойын көрсетіп келеді. Бұған дейінгі екі кездесуде де қарсыластарына есе жіберді. Алдымен Польшадан 3:5 есебімен жеңіліп қалған еді.
Одан кейін Голландияға 1:3 есебімен жол берді.
Ал үшінші кездесуінде Латвияға буллиттен 1:2 есебімен жол берді.
Бүгінгі кездесуде есепті Оңтүстік Корея құрамасының хоккейші қыздары ашты. Олар 8-минутта біздің қақпадан саңылау тапты. Келесі шайбаны да қарсыластарымыз 19-минутта соғып кетті. Екінші кезеңде де қазақстандықтардың қақпасынан екі шайба табылды. Оған қазақстандық спортшылар 51-минутта жалғыз ғана шайбамен жауап қайырды. Бұдан кейін Оңтүстік Корея құрамасының қыздары тағы бір гол салды. Осылайша Қазақстан құрамасы аталмыш қарсыласына 1:5 есебімен жол берді.
Аталмыш топта тағы екі кездесу өткізілді. Голландия Латвияны 3:1, Польша Қытайды 4:3 есебімен жеңді. Төрт турдан кейін Голландия құрамасы 12 ұпаймен көш бастап келеді. Одан кейінгі орындағы Польшаның - 9, Қытай мен Оңтүстік Кореяның - 6, Латвияның 6 ұпайы бар.
Соңғы тур ойындары 12 сәуірде өткізіледі. Бұл күні Польша мен глландия, Оңтүстік Корея мен Латвия, Қазақстан мен Қытай құрамалары кездеседі.
