Хорватияда 2 қаңтар - жер сілкінісі құрбандарын аза тұту күні

ЗАГРЕБ. ҚазАқпарат – Хорватия үкіметі 2 қаңтарды ресми түрде сейсенбіде болған 6,3 балдық жер сілкінісінен қаза тапқандарды аза тұту күні деп жариялады. Бұл туралы ҚазАқпарат HINA агенттігіне сілтеме жасап хабарлайды.

«Мен осы мәселе бойынша республика президентімен және парламент төрағасымен кеңестім. Олар да осы шешімді қолдайды», - деді елдің премьер-министрі Андрей Пленкович.

Үкімет отырысы сәрсенбі күні жер сілкінісі құрбандарын бір минут үнсіздікпен еске алумен басталды.

Еске сала кетейік, сейсенбіде 6,3 балдық жер сілкінісі тіркелген еді. Зілзала ошағы Хорватия астанасы Загреб қаласының оңтүстік –шығысында 46 шақырым жерде орналасқан. Тереңдігі - 5 шақырым.

Агенттіктің хабарлауынша, зілзала салдарынан қаза тапқандар саны жеті адамға жетті.

Хорватиядағы жер асты дүмпулері дүйсенбі күні таңертеңнен бері тоқтаған жоқ. Соңғы 49 сағат ішінде елде 40 жер асты дүмпуі тіркелген. Жер асты дүмпулері Италияда, Словенияда, Босния мен Герцеговинада, Сербияда және Австрияның оңтүстік-шығыс аймақтарында сезілді.

Фотo: the-sun.com