Хуситтер Аден шығанағында америкалық кемеге зымыранмен шабуыл жасағанын мәлімдеді
АСТАНА. KAZINFORM – Йемендік хуситтер Аден шығанағында америкалық Chem Ranger кемесіне зымыранмен шабуыл жасады. Бұл туралы «Ансар Аллах» көтерілісшілер қозғалысының әскери өкілі Яхья Сария мәлімдеді, деп хабарлайды ТАСС ақпарат агенттігі.
«Йемен әскери-теңіз күштері Аден шығанағында америкалық Chem Ranger кемесіне бірнеше зымыранмен шабуыл жасаған операцияны өткізді», - деді Сария хуситтерге тиесілі Al Masirah эфирінде.
Қозғалыс өкілінің сендіруінше, хуситтер кемеге тікелей соққыны тіркеді. Ол сондай-ақ бұл шабуылдың АҚШ пен Ұлыбританияның Йемен аумағындағы «Ансар Аллах» нысандарына жасаған соққыларына жауап болғанын қосып өтті.
Бұған дейін Ұлыбритания Әскери-теңіз күштерінің теңіз саудасын үйлестіру орталығы (UKMTO) бейсенбі күні Йемен жағалауына жақын жерде болған екі оқиға туралы хабарлады. UKMTO мәліметінше, бірінші оқиға Эш-Шихр қаласынан оңтүстік-шығысқа қарай 85 теңіз миль жерде болған. Теңіз қауіпсіздігін қамтамасыз ететін британдық Ambrey компаниясының мәліметінше, Маршалл аралдары жалауымен жүзіп жүрген американдық танкерге Эль-Мукалла қаласынан оңтүстік-шығысқа қарай шамамен 87 миль жерде төрт ұшқышсыз басқарылатын ұшақ жақындаған. UKMTO тіркеген тағы бір оқиға Аден портынан оңтүстік-шығысқа қарай 115 теңіз милінде орын алды. Бірінші жағдайдағыдай, Ambrey Маршалл аралдарының жалауымен жүзіп келе жатқан танкерге ұшқышсыз ұшақтардың жақындағанын хабарлады. Ambrey мәліметінше, оқиға Аденнен оңтүстік-шығысқа қарай 103 миль жерде болған.
MarineTraffic кемелерді қадағалау қызметінің хабарлауынша, химикаттар тасымалдайтын Chem Ranger танкері Маршалл аралдарының туы астында Жидда портынан Кувейтке қарай жүзіп келеді. Соңғы рет кеме өзінің орналасқан жері туралы деректерді 16 қаңтарда жіберген еді – ол кезде кеме Қызыл теңіздің орталық бөлігінде, жөнелту портына жақын жерде болған.
