ІІМ 2015 жылғы бюджеттік бағдарламалардың үздік әкімшісі болып танылды
АСТАНА. ҚазАқпарат - Қазақстан Республикасы Қаржы министрлігі Қазынашылық комитеті бюджетті атқарудың сапасын көтеру, қаржылық тәртіпті жақсарту, бюджеттік бағдарламалар әкімшілері мен мемлекеттік мекемелердің (бұдан әрі - ББӘ және ММ) бухгалтерлік қызметтерінің біліктілік деңгейін көтеру мақсатында ағымдағы жылы алғашқы рет ББӘ және ММ арасында 2015 жылдың қорытындысы бойынша рейтинг жүргізді.
Рейтинг Қазынашылық комитеті төрағасының 2015 жылғы 16 қыркүйектегі №144 «Үздік бюджеттік бағдарламалар әкімшісі» және «Үздік мемлекеттік мекеме» атағы номинациялары бойынша рейтинг жүргізу бойынша әдістемесін бекіту туралы» бұйрығының негізінде жүргізілді.
Рейтинг бюджетті атқару сапасын сипаттайтын көрсеткіштер негізінде белгіленді.
Бағалау қорытындысы бойынша «2015 жылғы бюджетті атқару бойынша бюджеттік бағдарламалардың Үздік әкімшісі» номинациясында Қазақстан Республикасы Ішкі Істер министрлігі жеңімпаз атанды.
Қазынашылық комитеті мемлекеттік мекемелерді бағалауды алдағы уақытта да жыл сайын жүргізетін болады, деп хабарлайды ІІМ баспасөз қызметі.
