Іле Алатауының бөктерінде арнайы мақсаттағы оқу-жаттығулар өтуде (ФОТО)
Осы мақсатта Алматыдағы ҚР ҚМ әскерінің орталық спорт клубының «Тұйық су» таулы оқу-жаттығу орталығының базасында лагерлік жиын өрістетілді, деп хабарлайды ҚР Қорғаныс министрлігінің баспасөз қызметінен.
«Екі апта ішінде әскери қызметшілер таулы шыңға шығуды, таулы аймақта техникамен жүру арқылы Іле Алатауының мұз бен қар басқан күрделі жерлерінде ұрысты игерді», делінген хабарламада.
Арнайы мақсаттағы әскерилерге таулы жерлерде даярлықты жүргізуге ҚР ҚМ АОСК әскерінің тәжірибелі спортшыларынан құралған арнайы мақсаттағы командасы нұсқаушылық етеді. Команданың бастығы аға лейтенант Мақсұт Жұмаев аталған жиындар жауынгерлердің машықтанған дағдысын қалыптастырып, арнайы бөлімшелермен тәжірибе алмасу үшін маңызды деп атады.
Әскери қызметшілер жиынның барлық уақытын далалық жағдайда өткізеді. Осыған орай таулы оқу-жаттығу аймағында шатырлы лагерь құрылды.
Оқу-жаттығудың соңында олар емтихандар мен сынақтар тапсырады. Тексеру нәтижелері арнайы мақсаттағы бөлімшелердің таулы жерлерде және күрделі ауа райында жауынгерлік іс-қимылды жүргізуде даярлық деңгейін көрсетеді.