«ИМ» содырларының 1 жылда ядролық қаруға қол жеткізу қаупі бар

АСТАНА. ҚазАқпарат - «Ислам мемлекеті» террорлық ұйымы (ИМ) насихат құралдары арқылы алдағы 12 ай ішінде Пәкістаннан ядролық қару сатып ала алатынын хабарлады, деп жазады РИА Новости «Independent» газетіне сілтеме жасай отырып. «ИМ» содырлары жаппай қырып жоятын қаруды пайдалана алатындығы жайлы материал радикалдардың «Dabiq» журналында жарыққа шықты.

«ИМ» банк шотында бірнеше млрд доллар бар. Олар Пәкістандағы парақор шенеуніктер арқылы ядролық қару сатып алуға қауқарлы», делінген тұтқындағы британиялық журналист Джон Кэнтлидің (John Cantlie) «The Perfect Storm» журналындағы мақаласында.

Кэнтлидің сөзіне қарағанда, исламистер «өткенде жасалған лаңкестік әрекеттерінен әлдеқайда ауыр тиетін және ауқымды лаңкестік іс-әрекетті жүзеге асырмақ. Айта кету керек, радикалдар өзінің насихат жұмысында Джон Кэнтлиді жиі пайдаланады. Содырлар желіге Кэнтлидің бірнеше видео мәлімдемесін жариялаған. Солардың бірінде сириялық оппозицияға көрсетіп жатқан АҚШ көмегінің нәтижесіз екені айтылған. «Ислам мемлекеті» лаңкестік ұйымы 2014 жылы Сирия мен Иракта жаулап алған аумақтарда «халифат» жариялады. Содырлардың қатыгез әрекетінен мыңдаған бейбіт тұрғын қаза тапты, жүз мыңдаған адам босқынға айналса, мыңдаған адам тұтқында отыр.