Индиан-Уэллс турнирі: Анна Данилина жарыс жолынан шығып қалды

АСТАНА. KAZINFORM – Қазақстанның жұптық сындағы бірінші, әлемнің 17-ракеткасы Анна Данилина Индиан-Уэллс (АҚШ) WTA 1000 турнирінің екінші айналымына шыға алмады.

Ресейлік Ирина Хромачевамен бірге жарыстың 7-ракеткасы болып тіркелген А.Данилина бастапқы матчында словакиялық Тереза Михаликова – ұлыбританиялық Оливия Николлспен бетпе-бет келді.

Данилина мен Хромачева кездесуді сәтті бастады – 6:3. Алайда сол қарқынын жалғастыра алмады - 3:6, 8:10.

Сағат жарымға жуық уақытқа созылған бәсеке барысында екеуі 1 эйспен бірге 4 брейк-пойнттың үшеуін пайдаланды. Михаликова – Николлс эйс жасамағанымен, 8 брейк-пойнттың үшеуін өз есептеріне жазды.

Қазақстанның жекелей сындағы екінші, әлемнің 20-ракеткасы Юлия Путинцева да сәтсіздікке тап болды. Ол әлемдік рейтингідегі чехиялық Катержина Синяковаға жол берді – 2:6, 2:6.

Осылайша, өткен жылы мұнда төртінші айналымға дейін жеткен Ю.Путинцева сол табысын қайталай алмады. Соның салдарынан ол WTA Live рейтингісінде 22-орынға төмендеп тұр.

Қазақстанның көшбасшы теннисшісі Елена Рыбакинаның үшінші айналымдағы қарсыласы анықталды. Ол әлемнің 38-ракеткасы, ұлыбританиялық Кэти Бултермен төртінші айналым жолдамасын сарапқа салады. К.Бултер рейтингіде 74-сатыдағы румыниялық Ирина Бегуден айласын асырды – 6:7 (2:7), 6:3, 6:0.

Еске сала кетейік, бұдан бұрын Индиан-Уэллс турнирінде Елена Рыбакинаның үшінші айналымға шыққанын жазған болатынбыз.