Индиан-Уэллс турнирі: Бублик әлемнің 349-ракеткасынан жеңіліп қалды

АСТАНА. KAZINFORM – Қазақстанның бірінші, әлемнің 82-ракеткасы Александр Бублик Индиан-Уэллс (АҚШ) мастерс турнирінің екінші айналымына шыға алмады. 

Өткен жылы әлемдік рейтингіде 17-орынға дейін көтерілген Бубликтің кейінгі кезде ойыны әбден қожырап кетті.

Бұл жолы ол жарысқа іріктеу сайыстарынан кейін қосылған дүниежүзілік рейтингіде небәрі 349-орында тұрған жапониялық Йосуке Ватанукиге есе жіберді — 3:6, 6:3, 3:6.

1 сағат 38 минутқа созылған бәсеке барысында Бублик 13 эйспен бірге 4 брейк-пойнттың біреуін ғана пайдаланды. Ватануки 13 эйс, 2 брейкпен (11 брейк-пойнт) көзге түсті.

Жапониялық спортшы үшінші айналымға шығу үшін әлемнің 20-ракеткасы, чехиялық Томаш Махачпен таласады.

Өткен жылы Индиан-Уэллсте Бублик үшінші айналымнан аса алмаса, биыл бастапқы кездесуінде-ақ жеңіліп қалды.

Жүлде қоры 13 млн АҚШ долларынан асатын дода 16 наурызда мәресіне жетеді.

Әйелдер арасында осы турнирді екінші айналымнан бастайтын Елена Рыбакина мен Юлия Путинцеваның қарсыластары анықталды. Рыбакина рейтингіде 64-орындағы нидерландылық Сюзан Ламенспен, Путинцева әлемнің 59-ракеткасы, чехиялық Катержина Синяковамен ойнайды.

Еске сала кетейік, бұдан бұрын теннистен Индиан-Уэллс турнирінде Рыбакинаның кімдермен кездесуі мүмкін екенін жазған болатынбыз.

Сондай-ақ Тимофей Скатов жұптық сында Грекиядағы жарыстың ширек финалына шықты.