Индиан-Уэллс турнирі: Юлия Путинцева жұптық сында екінші айналымға шықты

АСТАНА. KAZINFORM – Қазақстандық теннисші Юлия Путинцева Индиан-Уэллс (АҚШ) WTA 1000 турнирінің 1/8 финалына өтті.

Ю.Путинцева даниялық Клара Таусонмен бірге бастапқы кездесуін жапониялық Макото Ниномия – испаниялық Сара Соррибес-Тормомен өткізді.

Бірінші партияда қазақстандық-даниялық жұп бет қаратпады – 6:0. Екіншісінде жапониялық-испаниялық дуэт есе қайырды – 6:4. Дегенмен супер тай-брейкте Путинцева – Таусон жеңісті жұлып алды – 10:5.

Бір сағат 21 минутқа созылған бәсекеде екеуі 1 эйспен бірге 7 брейк-пойнттың бесеуін пайдаланды. Ниномия – Соррибес-Тормо 3 брейкпен (8 брейк-пойнт) шектелді.

Юлия Путинцева – Клара Таусонның екінші айналымдағы қарсыластары кейін анықталады.

Ерлер арасында Индиан-Уэллс мастерс жарысында қазақстандық, әлемнің 98-ракеткасы Александр Шевченок рейтингіде 83-орындағы жапониялық Ринки Хиджикатаға еш қайрат қыла алмады – 1:6, 3:6. Осылайша, Бублик те, Шевченко да жапониялық спортшыларға есе жіберіп, жарыс жолынан ерте шығып қалды.

Тағы бір қазақстандық, әлемнің 182-ракеткасы Тимофей Скатов Херсониссос (Грекия) челленжер додасында рейтингіде 366-сатыдағы аустриялық Деннис Новактан 4:6, 6:3, 3:6 есебімен ұтылып, ширек финалға шыға алмады.

Т.Скатов сондай-ақ жұптық сында болгариялық Димитар Кузмановпен бірге литвалықтар Эдас Бутвилас – Ричардас Беранкистен 6:7 (5:7), 3:6 есебімен ұтылып, жартылай финалдан тыс қалды.

Еске сала кетейік, бұдан бұрын Индиан-Уэллс турнирінде Бубликтің әлемнің 349-ракеткасынан жеңіліп қалғанын жазған болатынбыз.