Intuitive Machines компаниясының «Athena» модулі Айға қонды
АСТАНА. KAZINFORM — Хьюстондық Intuitive Machines компаниясы жасаған екінші коммерциялық ай модулі Айдың оңтүстік полюсі маңына қонды, деп хабарлайды CBS News.
IM-2 ғарыш аппараты, яғни Intuitive Machines компаниясының «Athena» модулі сегіз күн бұрын SpaceX Falcon 9 зымыранымен ұшырылған болатын.
«Athena» өзімен бірге күрделі ғылыми құралдарды, екі шағын роверді, ұялы байланысқа арналған тәжірибелік жабдықты және арнайы «hopper» құрылғысын алып ұшты. Бұл құрылғы қону модулінің маңында бір нүктеден екінші нүктеге секіру үшін әзірленген.
Алдын ала болжам бойынша, модуль Айдың оңтүстік полюсінен шамамен 100 миль қашықтықта қонған.
Диспетчерлер ғарыш кемесінің негізгі қозғалтқышы өшірілгенін, оның күн панельдері электр қуатын өндіре бастағанын және қону модулінің борттық компьютері Жермен байланыста екенін, командаларды қабылдап жатқанын растады.
Алайда, Джонсон атындағы ғарыш орталығының мамандары қону модулінің инерциялық өлшеу блогынан (IMU) мәлімет түскенін хабарлады. Ол бойынша «Athena» модулі бүйіріне аунап түскен.
Қону сәті осыдан тура бір жыл бұрын Айға жеткен Intuitive Machines компаниясының алғашқы «Odysseus» модулінен кейін орын алды. Ол да қону тірегі істен шығып, бүйіріне құлаған болатын.
Бұған дейін SpaceX компаниясының Starship мегазымыранының тағы бір сәтсіз ұшырылымы туралы хабарланған еді. Бұл жаңа зымырандарды әзірлеу барысында екінші рет қатарынан орын алған апат болды.
