Инвестициялық жобаларды пысықтауда мемлекеттік органдар сылбыр – Олжас Бектенов

АСТАНА. KAZINFORM – Үкімет басшысы экономиканың нақты секторын қаржыландырудағы кедергілерді атады.

— Экономиканың нақты секторын қаржыландыру — серпінді экономикалық өсудің аса маңызды факторы. Өндіріс, инфрақұрылым, агроөнеркәсіп кешені, көлік және энергетика салаларына ауқымды инвестициялар салынған жағдайда өсімді қамтамасыз ету мүмкін болмақ. Дегенмен қазір шешімін таппаған бірқатар өзекті мәселе бар. Соның бірі инвестициялық жобаларды пысықтау кезінде мемлекеттік органдардың қимылы — сылбыр, — деді Олжас Бектенов Үкімет отырысында. 

Премьер-министрдің айтуынша, мемлекеттік органдардың белсенді жұмысы байқалмайды.

— Біз ұзақ келісу рәсімдері мен бюрократиялық кедергілердің кесірінен немесе ведомствоаралық өзара байланыстардың жоқтығынан болашағы зор бастамалардың баяулап қалғанын көріп жүрміз. Жақында мен инвестициялық ахуалға арналған кеңес өткіздім. Көп уақыт бойы созылып келген сұрақтар сол арада бірден шешімін тапты. Барлық мемлекеттік орган «бюрократияға мүлде жол жоқ» қағидаты бойынша жұмыс істеуге тиіс, — дейді Олжас Бектенов.

Айта кетсек, биыл Үкімет «Бәйтерек» холдингінің капиталын 1 трлн теңгеге ұлғайтпақ.