Инвестордың құқығын бұзған 140 лауазымды тұлға жазаланды

АСТАНА. Kazinform — Елімізде инвесторлардың құқығын бұзған 140 лауазымды тұлға жазаланды. Бұдан былай инвестордың құқығын қорғау шаралары күшейтіледі. Бұл туралы ҚР Бас прокуратурасы Қоғамдық мүдделерді қорғау қызметі бастығының орынбасары Ризат Смағұлов мәлімдеді.

— Ақмола облысында агроөнеркәсіп саласындағы ірі испандық инвестор 3 жыл бойы жер ала алмай, нарықтан кетіп қала жаздады. Қызылорда облысында түрік инвесторы жылу энергиясын өндіретін аралас циклді газ зауытын салуды бастады. Жалпы инвестиция көлемі 196 млрд теңге. Әкімдік зауыт құрылысына қажетті жер телімін беру мәселесін алты ай бойы созбаланға салып, нәтижесінде қажетті 8,5 га көлемінен 2 есе аз учаскені ұсынды. Мұндай жерге зауыт салу мүмкін емес. Бұл инвестициялық жоба прокурорлардың сүйемелдеуіне алынып, 1,5 ай ішінде инвесторға қажетті ауданы бар жер телімі бөлінді. Осы жылдың қыркүйек айында зауыттың толық іске қосылуы жоспарланған, — деді ол ОКҚ алаңында.

Оның айтуынша, ендігі жерде инвестордың құқығын бұзу фактісі бойынша кінәлілерді жауапқа тарту мәселесі түбегейлі жолға қойылады.

— Мысалы, Атырауда инвесторға жер учаскелерін беруден негізсіз бас тартқаны үшін қала әкімінің орынбасары жазаланды. Жалпы, прокурорлар инвесторларды қорғау мәселесіне қатысты 220 қадағалау актісін енгізіп, мемлекеттік органдардың 60 актісінің күшін жойды, 140 лауазымды тұлға жазаланды, — деп түйді сөзін Бас прокуратура өкілі.

Айта кетейік, күні кеше АҚШ инвесторы қазақстандық ІТ-стартапқа $1 млн көлемінде инвестиция құйғаны туралы жазған едік.