Инвесторлар тізіліміне жалпы құны 7 трлн теңге болатын 250 жоба енгізілді - Бас прокуратура

АСТАНА. KAZINFORM – Прокуратура органдары жүзеге асырылып жатқан жобалар туралы ақпараттың шынайы көрсетілмеуіне байланысты бірқатар заңбұзушылықтар анықтады.

Бірқатар өңірде (жалпыұлттық пулға 150 мың айлық есептік көрсеткіштен асатын жобалар енгізіледі, қалғандары өңірлік пулдарға кіреді) жалпыұлттық және өңірлік пулдарда өзектілігін жоғалтқан инвестициялық жобалар тіркелген.

- Абай және Ақмола облыстарында бекітілген өңірлік инвестициялық жобалардың пулдары мүлде болмаған. Бас прокуратураның ұсынысы бойынша бұл кемшіліктер жойылды.

Инвесторлар тізіліміне 7 трлн теңгеге 250 инвестициялық жоба енгізілді, өңірлік пулға қосымша 290 жоба енгізілді, - делінген бақылаушы органның ақпаратында.

Сонымен қатар 136 өзектілігін жоғалтқан жоба тізілімнен алынып тасталды.

Жол берілген заңбұзушылықтар үшін мемлекеттік органдардың 6 лауазымды тұлғасы тәртіптік жауапкершілікке тартылған.

Айта кетейік, Абай облысында 200 млн теңгеге заңсыз мемлекеттік келісімшарт жасалған.