Иордания екі зымыранды атып түсірді
АСТАНА.KAZINFORM — Аммандағы Kazinform агенттігінің меншікті тілшісі хабарлағандай, Иордания билігі бірнеше аймақта зымыран сынықтарының түскенін растады, қаза тапқандар жоқ.
Иордания билігі корольдік аумағына бағытталған екі баллистикалық зымыранды атып түсіргенін мәлімдеді. Араб армиясы мен Иордания Қарулы күштерінің хабарлауынша, сенбі күні зымырандар әуе қорғаныс жүйесі арқылы табысты жойылған.
Иордания Қоғамдық қауіпсіздік қызметінің мәліметінше, таңнан сағат 14:00-ге дейін азаматтық қорғаныс қызметі мен полиция Амман, Зарка, Джераш, Мадаба және Ирбид провинцияларында 12 хабарламамен жұмыс істеді. Қаза тапқандар мен жараланғандар жоқ, тек материалдық шығын тіркелген.
Бұған дейін кейбір БАҚ Аммандегі тұрғын үйге зымыран түскені туралы хабарлап, видеокадрлармен бірге түтін мен жалын көрсеткен, бірақ ресми билік тікелей соққы түскенін растамаған.
مقطع يوثق سقوط شظايا صاروخ في منطقة مرج الحمام بالعاصمة الأردنية عمّان#اخبار_المشهد #الاردن pic.twitter.com/lOI85d85V4
— Al Mashhad المشهد (@almashhadmedia) February 28, 2026
Иордания телеарнасы «Аль-Мамляка» зымыран сынығының астаналық Мардж әл-Хамам ауданында түскенін хабарлады.
شاهد | لحظة سقوط شظايا صاروخ في مرج الحمام#الأردن #هنا_المملكة pic.twitter.com/DTRGbpuhuR
— قناة المملكة (@AlMamlakaTV) February 28, 2026
Иордания үкіметтік коммуникациялар министрі және ресми өкілі Мұхаммад аль-Мумани аймақтағы жағдайды мұқият бақылап отырғандарын және басты міндет – мемлекет пен азаматтардың қауіпсіздігін қамтамасыз ету екенін атап өтті.
— Иордания Қарулы күштері корольдік аумағына бағытталған екі баллистикалық зымыранды сәтті атып түсірді, — деді ол.
Елдің әр аймағына түскен сынықтар профильді қызметтер арқылы дереу жойылған.
Министр азаматтарды қауіпсіздік күштерінің нұсқауларын орындауға, расталмаған ақпарат таратпауға және тек ресми деректерге сүйенуге шақырды. Қарулы күштер толық дайындыққа қойылған және кез келген қауіпке жауап беруге әзір.
Билік сонымен қатар, әуе қатынасы кешігуі мүмкін болғандықтан, жолаушыларға әуежайға бармас бұрын рейстер мәртебесін авиакомпаниядан алдын ала тексеруді ұсынды.
Еске сала кетейік, сенбі күні Израиль премьер-министрі Биньямин Нетаньяху Израиль мен АҚШ-тың Иранға қарсы бірлескен операциясын жариялап, Ислам Республикасының аумағына соққы жасаған болатын. Тегеран Израиль мен АҚШ-тың Таяу Шығыстағы базаларына жауап соққыларын жүзеге асырды.
