Иорданиядағы шіркеу маңындағы атыстан қаза тапқандар саны сегіз адамға жетті
АСТАНА. KAZINFORM – Иорданияның Әл-Карак қаласындағы шіркеуде жерлеу рәсіміне қатысушыларға жасалған қарулы шабуылдан қаза тапқандар саны сегізге жетті. Тағы бір зардап шеккен адамның жағдайы ауыр, деп хабарлайды Anadolu агенттігі.
Бұл туралы Иорданияның Денсаулық сақтау министрі Ибрагим әл-Будур мәлімдеді.
Министрдің айтуынша, шабуыл бір күн бұрын Әл-Карак провинциясындағы Хаммуд шіркеуінде жерлеу рәсімі өтіп жатқан кезде болған. Ол зардап шеккендердің бірінің жағдайы өте ауыр екенін нақтылады.
Бұған дейін Иорданияның Қоғамдық қауіпсіздік басқармасының бас директоры, генерал-майор Убейдулла әл-Маайта жеті адамның қаза тауып, 27 адамның ауруханаға жеткізілгенін хабарлаған еді.
Шабуылдан кейін Иордания королі II Абдалла кінәлілерге қатысты қатаң шаралар қолданылатынын мәлімдеді.
– Каракқа қарсы жасалған террористік актіге ең қатаң жаза шараларымен жауап береміз, – деп жазды монарх X әлеуметтік желісінде.
Иорданиялық БАҚ-тың мәліметінше, қарулы үш адам шіркеу маңында көліктен түсіп, айналасына бей-берекет оқ атқан.
Шабуыл кезінде шіркеудің ішінде және сыртында 150-ден астам адам болғаны хабарланды. Бұған дейін Иордания үкіметі бұл оқиғаны террористік қылмыс деп бағалаған.
Айта кетейік, бұған дейін Иорданияда ескі оқ-дәрі жарылып, бір адам қаза тапқанын жаздық.
