Ирак халқының саны 46 миллионға жетті

АСТАНА. KAZINFORM —  Ирактың жоспарлау министрлігі дүйсенбіде жалпы санақтың негізгі нәтижелерін жариялады, деп хабарлайды Kazinform агенттігінің меншікті тілшісі.

Ресми мәлімдемеге сәйкес, ел халқының саны 46 миллион 118 мың адамға жетті.

Нәтижелерді жариялауға арналған баспасөз мәслихатында Ирактың жоспарлау министрі Мохаммед Тамим санақ «үкіметтің елдегі жағдайды жақсартуға деген жігерлігін көрсетеді» деп мәлімдеді.

2024 жылғы санақтың соңғы деректері халық санының 1 миллионнан астам адамға өскенін көрсетеді. Бұл ретте 2024 жылдың қарашасында халық санына алдын ала бағалау жүргізілгенде көрсеткіштер 45,407 миллион шамасында болған еді.

Бұған дейінгі жалпы халық санағы 1957 жылы болған, сол кезде Иракта халық саны 6,5 миллион адам болған. Осылайша, сол кезеңнен бері Ирак халқының саны 39 миллионнан астам адамға көбейді.

Бейресми есептеулер бойынша 2009 жылы халық саны 31,6 млн адамды құраған.

Ирак билігі халық санағын маңызды кезең деп атады және ол болашақта ресурстарды жоспарлау мен бөлу үшін маңызды деректер беретінін мәлім етті.

Ирак үкіметі ондаған жылға жалғасқан соғыс пен тұрақсыздықтан кейін қол жеткізген қауіпсіздік жетістіктерін нығайтуға тырысады және аймақтық күйзеліс кезеңінде экономиканы дамытуға тырысады.

Санақ жалпы Ирак пен елдің солтүстігіндегі жартылай автономиялық аймақ Ирак Күрдістанындағы экономикалық, білім беру және тұрғын үй жағдайлары туралы егжей-тегжейлі ақпарат береді.

Иракта қала және ауыл тұрғындары қанша?

Федералдық Иракта халықтың шамамен 70,17%-ы қалалық жерлерде тұрады, ал Күрдістанның қалалық аудандары күрд халқының 84,57% құрайды. Күрд аймағында жұмыспен қамту деңгейі жоғары екені байқалады: халықтың 46%-ы экономикалық тұрғыда белсенді, ал федералды аудандарда бұл көрсеткіш 41,6% шамасында болды.

Бастауыш мектепке қабылдау Иракта 88% болса, ал күрд аудандарында 93% төңірегінде.

Гендерлік арақатынас 100 әйелге шаққанда 101 ер адамды құрайды, бұл әлемдік орташа көрсеткішке жақын.

Жас шамасы 

Санақ бойынша халықтың 11,16%-ын бес жасқа дейінгі балалар, 24,74%-ын 5-14 жас аралығындағы балалар құрайды.

15 пен 64 жас аралығындағы халықтың 60,44%-ы еңбекке қабілетті. Егде жастағы адамдар (65+ жас) — 3,66%.

Сонымен қатар есепте Ирактағы сауатсыздық деңгейі 15,31% екені, ал Күрдістанның аймақтық Үкіметінде ол сәл жоғарылап, 16,23% құрайтыны көрсетілген.

Елде некеге тұрудың орташа жасы 22,24 жасты құрайды. Ерлер орта есеппен 24,06 жаста, ал әйелдер 20,7 жаста шаңырақ көтереді. Ерлі-зайыптылардың орташа жасы ерлер үшін 23 жас, әйелдер үшін 20 жас.

Экономикалық белсенділік

Экономикалық тұрғыда белсенді халық (15 жас және одан жоғары): Иракта — 41,61%, Күрдістанда — 46,06%.

Мемлекеттік сектордағы жұмыспен қамту: жұмыс күшінің 38,25%-ы — Иракта, 37,18%-ы — Күрдістанда.

Өткен жылы қарашадағы халық санағы бүкіл елді, соның ішінде Ирактың солтүстігіндегі күрд аймағын да қамтыды және 37 жыл ішінде бірінші рет өткізілді.

Ирак 1987 жылдан бері толық санақ жүргізбеген. 1997 жылғы санақ Ирак Күрдістан аймағын қамтымаған. Сонымен қатар 2020 жылға жоспарланған санақ коронавирустық пандемияға байланысты кейінге қалдырылды.

Осыған дейін Иракта 27 жылда алғаш рет халық санағы өтетіні хабарланды.