Иран АҚШ-пен жанама келіссөздер жүргізуге дайын – Хаменеи кеңесшісі
АСТАНА. KAZINFORM – Тегеран америкалық тарапты тыңдап, өз шарттарын қойып, тиісті шешім қабылдауды жоспарлап отыр, деп хабарлайды Kazinform агенттігінің меншікті тілшісі.
Иранның Жоғарғы көшбасшысының кеңесшісі Камаль Харрази бейсенбі күні Тегеран АҚШ-пен дауларды реттеу үшін барлық есікті жаппағанын және Вашингтонмен жанама келіссөздер жүргізуге дайын екенін мәлімдеді. Бұл туралы ирандық ISNA агенттігі хабарлады.
— Ислам Республикасы барлық есікті жапқан жоқ. Ол АҚШ-пен жанама келіссөздер жүргізуге дайын, басқа тарапты бағалап, өз шарттарын қойып, тиісті шешім қабылдауға ниетті, — деді Харрази.
Харрази – Халықаралық қатынастар жөніндегі стратегиялық кеңестің басшысы және Иранның бұрынғы сыртқы істер министрі (1997–2005).
Ол АҚШ шенеуніктерінің бірде «соғыс», бірде «келіссөздер» туралы қарама-қайшы сигналдар жіберіп отырғанын айтты.
— Бүгінде біз АҚШ шенеуніктерінің әрекетінен психологиялық соғысты немесе «не соғыс, не келіссөздер» саясатының шабытын байқап отырмыз, — деп атап өтті Харрази.
Осы айда АҚШ президенті Дональд Трамп Иранның Жоғарғы көшбасшысы Әли Хаменейге ядролық келіссөздер жүргізу туралы талап қойылған хат жіберді. Бұл хатта келіссөздер туралы ұсыныс пен егер Иран бастамадан бас тартып, ядролық бағдарламасын жалғастырса, салдары болатыны туралы ескерту қатар берілді.
Трамп хатында Иранға жаңа келісім жасау үшін екі ай мерзім белгіледі.
Тегеранның ресми ұстанымы осы уақытқа дейін АҚШ-тың «максималды қысым» саясаты жалғасып жатқанда, Трамп әкімшілігімен ынтымақтастық жасамау болды. Бұл саясат Иран Ислам Республикасына қатаң санкциялар салуды көздейді.
Хаменеи Трамптың хаты мен келіссөздер туралы ұсынысын «Иранды келіссөздерден бас тартатын етіп көрсетуге бағытталған алдау» деп атады. Дегенмен, бірнеше сағаттан кейін Иранның БҰҰ-дағы миссиясы X (бұрынғы Twitter) әлеуметтік желісінде Иранның ядролық бағдарламасы бойынша келіссөздерді жоққа шығармайтын мәлімдеме жариялады.
14 наурызда Иран, Ресей және Қытайдың қатысуымен ирандық ядролық бағдарлама бойынша келіссөздер Бейжіңде өтті.
