Иран АҚШ-тың кеме қатынасына қатысты жаңа санкцияларын айыптады
АСТАНА.KAZINFORM - Иран Сыртқы істер министрлігі АҚШ-тың мұнай өнеркәсібіне қарсы жаңа санкциялары негізсіз және халықаралық стандарттарға қайшы деп санайды, деп жазады Кazinform-ның меншікті тілшісі.
IRNA ақпарат агенттігінің хабарлауынша, Иран жұма күні Вашингтонның кеме қатынасына қатысты санкциялар енгізу туралы шешімін айыптап, бұл оның серіктестерімен заңды сауда жасауына кедергі келтіретінін мәлімдеді.
- АҚШ жаңа әкімшілігінің Иранның экономикалық серіктестерімен заңды саудасына кедергі жасау арқылы Иран халқына қысым жасау туралы шешімі заңсыз, - деді Иран Сыртқы істер министрлігінің баспасөз хатшысы Эсмаил Багаи.
АҚШ Қаржы министрлігі бейсенбі күні жыл сайын Қытайға миллиондаған баррель Иран мұнайын жеткізуге көмектесетін бірнеше ұйымға, жеке тұлғаларға және танкерлерге жаңа санкциялар салатынын мәлімдеді.
Бұл АҚШ президенті Дональд Трамп осы аптада Тегеранға «ең жоғарғы қысым» көрсету туралы меморандумға қол қойып, Иранның шикі мұнай экспортын нөлге дейін төмендетуге уәде бергеннен кейін Иран мұнайына қатысты АҚШ енгізген алғашқы санкциялар болып табылады. Бұл қадам Ислам Республикасының ядролық әлеуетін шектеу әрекеттерінің бір бөлігі ретінде қарастырылуда.
АҚШ Қаржы министрлігі сондай-ақ Иран мұнай сатудан түскен қаржыны ядролық бағдарламасын дамытуға инвестициялауға және көршілес елдердегі терроризмді қолдауға жұмсайды деп мәлімдейді.
