Иран Израиль агенті болуы мүмкін 700 адамды ұстағанын хабарлады
АСТАНА.KAZINFORM - Иран билігі жасаған өлім жазалары мен жаппай тұтқындау Израильмен 12 күнге созылған қақтығыс салдарының бірі болды, деп хабарлайды Kazinform агенттігінің меншікті тілшісі.
Fars News агенттігінің хабарлауынша, Иранның барлау қызметі Израиль мүддесі үшін тыңшылық әрекеттер жасады деген күдікпен 700-ге жуық адамды ұстады.
- Жедел деректер мен тұрғындардан түскен хабарламалар негізінде барлау желілерінің құрамында болған жалдамалылар анықталып, қамауға алынды, - делінген хабарламада.
Операциялар барысында жарылғыш заттар, қашықтан басқару жүйелері мен тыңшылық құрылғылар тәркіленгені хабарланды. Бұған қоса, ирандық тарап Израиль барлауымен байланысы бар дрон құрастыратын жерасты шеберханалары табылғанын мәлімдейді.
Қауіпсіздік қызметтері Керманшах, Исфахан, Хузестан, Фарс және Лорестан провинцияларында операция жүргізгенін хабарлады. Бұқаралық ақпарат құралдарының хабарлауынша, ел астанасында да жеке тұтқындаулар болған, бірақ Тегеран бойынша ресми статистика жария етілмеген. Сонымен қатар Батыс Әзербайжан провинциясының әкімшілік орталығы Урмия қаласының түрмесінде Моссадпен ынтымақтаса жұмыс істеген үш адам өлім жазасына кесілді.
Three Mossad Spies Executed in Iranhttps://t.co/WH8BFdPmKa pic.twitter.com/x7CdEN36cC
— Fars News Agency (@EnglishFars) June 25, 2025
Идрис Әли, Азад Шоджаи және Расул Ахмад Расул қару-жарақ контрабандасы және Ирандағы жоғары лауазымды шенеунікті өлтіруге қатысы бар деген айыптармен «жердегі жемқорлық» және «Құдайға қарсы соғыс» үшін кінәлі деп танылды.
- Үшеуі де көрші елдегі Израиль барлау қызметінің қызметкерімен байланыста болған, - делінген іс материалында.
Израильдің арнайы операциялары
Израиль қақтығыс кезінде арнайы күштерінің Иранда әрекет еткенін растады.
Израиль қорғаныс күштері (ЦАХАЛ) бас штабының басшысы Эйял Замир Иранның жүздеген зымыран тасығышының істен шыққанын және соққылардың әуе кеңістігін жедел бақылауға мүмкіндік бергенін айтты. Қатысқан бөлімшелер туралы мәліметтер жарияланған жоқ.
Израильдің Моссад барлау қызметі сирек жариялаған мәлімдемесінде операцияны «тарихи» деп атап, Америка Құрама Штаттарына ынтымақтастығы үшін алғыс білдірді, деп хабарлайды The Times of Israel.
Агенттік басшысы Дэвид Барнеа ирандық қауіп «айтарлықтай бейтараптандырылғанын» айтып, ирандық жобаларды бақылауды жалғастыруға уәде берді.
Тегерандағы мемлекеттік жерлеу рәсімдері
Иран билігі Ислам революциясы Сақшылар корпусының қолбасшылары мен қақтығыс кезінде қаза тапқан ғалымдарды мемлекеттік жерлеу рәсімін жариялады. Рәсім сенбіге жоспарланған және жоғары лауазымды тұлғалардың қатысуымен Тегеранда өтеді.
Ирандық дереккөздердің хабарлауынша, соққының бірінші күні қаза тапқан СІҚК қолбасшысы Хоссейн Саламимен бөлек қоштасу рәсімі өтеді. Иран ақпарат құралдары қаза тапқандарды «қарсылық шейіттері» деп атап, бірнеше провинцияда жаппай еске алу шаралары өтетінін хабарлады.
Иранның Денсаулық сақтау министрлігі 13-25 маусым аралығында Израильдің елдегі соққыларынан 627 адам қаза тауып, кемінде 4870 адам жараланғанын хабарлады.
Министрліктің мәлімдемесіне сәйкес, құрбандардың 86%-ы оқиға орнында қаза тапты, ал Тегеран, Керманшах, Хузестан, Лорестан және Исфахан провинциялары ең көп зардап шеккен.
Сейсенбіге қараған түні АҚШ президенті Дональд Трамп атысты тоқтату туралы келісімді жариялағаннан кейін Иран мен Израиль арасындағы қақтығыстар тоқтатылды.
Айта кетейік, Иран Парламенті МАГАТЭ-мен ынтымақтастықты тоқтату туралы заң жобасын мақұлдады.
