Иран қамауда болған француз азаматын босатты

АСТАНА. KAZINFORM — Иран билігі 2022 жылдың қазан айынан бері қамауда жатқан француз азаматы Оливье Грондоны босатты, деп хабарлайды TRT ақпараттық агенттігі.

Франция Президенті Эммануэль Макрон X платформасында 34 жастағы Грондо «еркіндікке шығып, жақындарымен бірге» деп жазды. Ол «Иранда әлі де қамауда отырған екі француз азаматын босатуға күш-жігерімізді аямаймыз» деп қосты. Грондоның босатылу шарттары туралы қосымша мәлімет жарияланбады. Оңтүстік Францияның Монпелье қаласынның тумасы Грондо қазіргі уақытта ауруханада тексеруден өтуде. Соңғы айларда оның денсаулығы, әсіресе психологиялық тұрғыдан қатты әлсіреген.

Батыс елдері Иранды өз азаматтарын жалған айыптармен қамауға алып, оларды саудаласу құралы ретінде пайдалану үшін «мемлекеттік кепілдікке алу» стратегиясын қолдануда деп айыптап келеді.

Грондо 2022 жылдың қазан айында Иранның оңтүстігіндегі Шираз қаласында ұсталып, «Ислам Республикасына қарсы қастандық» үшін бес жылға бас бостандығынан айырылған еді.
Оның отбасы бұл айыптарды жоққа шығарып, Грондоны парсы поэзиясына құмар саяхатшы ретінде сипаттап, оны әлемдік тур аясында туристік визамен Иранға барғанын мәлімдеді.
Ал 2022 жылдың қыркүйегінен бері Иранда қамауда отырған тағы бір француз тұтқыны Луи Арно 2024 жылдың маусымында босатылған еді.

Еске сала кетейік, бұған дейін Израиль түрмесінде 45 жыл отырған палестиналықтың бостандыққа шығатыны туралы жазған болатынбыз.