Иранда әуе таксиі іске қосылды
АСТАНА. KAZINFORM – IRNA хабарлағандай, Иранда ел тарихындағы алғашқы әуе таксиі ресми түрде іске қосылды.

Салтанатты шараға президент қатысып, бейнеүндеу жолдады.
Алғашқы рейс Кередж бен Казвин қалаларын байланыстырып, тұрақты жолаушылар тасымалының басталғанын білдірді.
— Әуе таксиінің іске қосылуы – үлкен болашағы бар маңызды жетістік, — деді Иранның көлік министрінің кеңесшісі және «Паям» арнайы экономикалық аймағы мен халықаралық әуежайының бас директоры Мохсен Хасанлу.
Оның айтуынша, бұл жаңа көлік түрі Паям арнайы экономикалық аймағына инвестициялар тартуға, ұлттық экономиканы жандандыруға және Альборз провинциясының дамуына серпін береді. Сонымен қатар, халық үшін авиация қызметтерін кеңінен пайдалануға қолайлы жағдай жасайды.
— Әуе таксиі аз жүктелетін әуе бағыттарын жандандыруда маңызды рөл атқарады, — деп атап өтті Хасанлу.
Ол бұл қызметті «инновациялық шешім» деп бағалап, халықтың әуе тасымалына қол жеткізуіне және инвесторлар үшін жаңа мүмкіндіктердің ашылуына жол ашатынын айтты.
Мамандардың айтуынша, Иранда алғашқы әуе таксиінің іске қосылуы – елдің көлік инфрақұрылымын жаңғырту мен авиация қызметтерінің қолжетімділігін кеңейту жолындағы елеулі қадам.
Бұған дейін 2028 жылғы Олимпиадада Лос-Анджелесте әуе такси қызметі жоспарланып отырғанын жазғанбыз.