Иранның жоғарғы жетекшісінің резиденциясы зақымданды — БАҚ
АСТАНА. KAZINFORM — АҚШ пен Израильдің Тегеранға жасаған соққыларына байланысты Иранның жоғарғы жетекшісінің тағдыры жөнінде қарама-қайшы ақпараттар пайда болды, деп хабарлайды Аммандағы Kazinform агенттігінің меншікті тілшісі.
Батыс БАҚ-тың хабарлауынша, Тегерандағы Аятолла Али Хаменеи резиденциясы АҚШ пен Израильдің соққылары салдарынан айтарлықтай зақымданған. The New York Times газеті Airbus компаниясы жасаған 28 ақпан таңғы спутниктік суретті жариялады, онда ғимарат құрылымдарының зақымданғаны мен өрт іздері көрінеді.
We obtained the first known satellite image of Ayatollah Ali Khamenei's compound in Tehran. There are several destroyed buildings. While the current whereabouts of Iran's supreme leader are unknown, the compound is generally used as his official residence. 🛰️📸: @Airbus pic.twitter.com/48krjclMBL
— Christiaan Triebert (@trbrtc) February 28, 2026
Израильдік Channel 12 телеарнасы аты-жөнін атамаған дереккөздерге сілтеме жасап, Израильде Хаменеи өліп кетуі мүмкін деп бағалап жатқанын хабарлады. Бұрын канал жоғарғы жетекшінің кем дегенде жарақат алған болуы мүмкін екенін айтқан еді. Бұл ақпарат ресми түрде расталмаған.
Израильдің Kan телерадиокорпорациясы Хаменеиге байланыс жоқ екенін және оның жағдайы белгісіз екенін хабарлады.
Сонымен қатар, Иранның сыртқы істер министрі Аббас Арагчи NBC News-ке берген сұхбатында, Иранның жоғарғы жетекшісі «тірі» екенін айтты. Сондай-ақ, соққылардан кейін екі командир қаза тауып, елдің басқа жоғары лауазымды басшылары өз қызметінде қалып отырғанын атап өтті.
Reuters агенттігінің дерегі бойынша, Хаменеи резиденциясы орналасқан Пастер ауданында түтін көтерілген. Fars агенттігі Пастер және Кешвардуст аудандарына зымыран соққылары жасалғанын хабарлады.
Ирандық телеарна президент Масуд Пезешкианның зардап шекпегенін мәлімдеді.
Аймақтағы жағдайға байланысты әрі қарай шиеленісу қаупі күшейіп отыр. Иран Сыртқы істер министрлігі жауап әрекеттеріне дайын екенін жариялады.
Еске салайық, бұған дейін Израиль Иранға зымырандық соққылар жасаған болатын, ал Иран жауап ретінде аймақтағы американдық нысандарға соққылар жасады.
