Ішімдік ішіп, елдің мазасын алған үш жолаушы пойыздан түсірілді
ШАЛҚАР. ҚазАқпарат – Көлік полицейлері «Атырау-Алматы» бағытындағы пойыздан масайып қалған үш жолаушыны түсіріп алып қалды, деп хабарлайды ҚазАқпарат тілшісі Көліктегі полиция департаментінің баспасөз қызметіне сілтеме жасап.
«Шалқар станциясында көлік полицейлері «Атырау - Алматы» бағытындағы пойыздан үш жолаушыны алып қалды. Тексеру барысында 1971, 1978 және 1985 жылы туған үш азаматтың масайып, өздерін ашулы ұстап, адамдардың ар-намысына тіл тигізгені, осылайша жолаушылардың тыныштығын бұзғаны анықталды. Үшеуі де - Жамбыл облысының тұрғындары», - деп хабарлайды департаменттен.
Медициналық тексеру барысында үшеуінің орта дәрежеде мас болғаны белгілі болған.
«Құқық бұзушыларға қатысты ҚР ӘҚБжК 440-бабы 1-бөлігі бойынша әкімшілік хаттама толтырылып, 5 АЕК (12 625 теңгеден) көлемінде айыппұл салынды» делінген хабарламада.
Жыл басынан бері жалпы 46 301 адам әкімшілік құқықбұзушылыққа тартылып, оның 5501-і алкогольдік ішімдік ішіп, елдің тыныштығын бұзғаны үшін жазаланған. Оларға жалпы сомасы 85 млн теңгенің айыппұлы салынған.
