Испания футболдан Еуропа чемпионаты жартылай финалына шықты

АСТАНА. KAZINFORM — Футболдан 2024 жылғы Еуропа чемпионатында Испания құрамасы жартылай финалға берілген алғашқы жолдамаға ие болды.

Жанкүйерлер Испания және Германия кездесуін асыға күтті. Әлемнің үздік құрамалары тартысты ойын өткізетіні белгілі еді. 

Ойын барысында құрамалар бір-бірінің қақпасы маңында жиі бой көрсетті. Соған қарамастан бірінші кезеңде есепке өзгеріс енген жоқ.

Екінші кезеңде 51-минутта испаниялық Дани Ольмо есеп ашып кетті. Бұдан кейін германиялық футболшылар алға қарай ұмтылды. Дегенмен гол соғатын бірнеше мүмкіндікті мүлт жіберіп алды.

Ал 89-минутта германиялық Флориан Вирц таразы басын теңестірді.

Негізгі кезең 1:1 есебімен тең аяқталып, ойын овертаймға ұласты. 

Ойынның 119-минутында испаниялық Микель Мерин жеңіс голын соқты.

Осылайша Испания қарсыласынан 2:1 есебімен басым түсіп, жартылай финалға берілген алғашқы жолдамаға ие болды.

Енді сағат 00.00-де тағы бір ширек финалда Португалия мен Франция құрамалары ойнайды. 

Ал 6 шілдеде Англия мен Швейцария, Нидерланд пен Түркия кездеседі.