Испания құрамасы Ұлттар лигасы финалына шықты

АСТАНА. KAZINFORM — Бүгін футболдан UEFA Ұлттар лигасы А дивизионда плей-офф сатысында финалға шыққан екінші құрама анықталды.

Грерманияның Штутгарт қаласындағы «Штутгарт Арена» стадионында Испания және Франция шеберлік байқасты.

Ойынды испаниялық футболшылар белсенді бастады. Нәтижесінде бірінші кезеңде жылдам екі гол соғып үлгерді. Ойынның 23-минутында Нико Уильямс есеп ашса, 26-минутта Микель Мерино есепті үстемелей түсті. 

Одан кейін испаниялық Ламин Ямаль 54-минутта пенальтиден, Педри 55-минутта басымдықты арттырса, франциялық Килиан Мбаппе 59-минутта пенальтиден мүлт кеткен жоқ.

Ал Ламин Ямал 67-минутта тағы бір мәрте мергендік танытса, одан кейін франциялық Райан Шерки көздеген нысанадан мүлт кеткен жоқ.

Испаниялық Дани Вивиан 84-минутта автогол авторы атанса, 94-минутта франциялық Рандаль Коло Муани гол соқты.

Осылайша Испания қарсыласын 5:4 еесбімен басым түсіп, финалға жолдама алды.

Енді олар 8 маусымда финалда Португалиямен шеберлік байқасады. 

Сол күні 3-орын үшін Франция мен Германия кездеседі.

Айта кетсек, 4 маусымда тағы бір жартылай финалда Португалия құрамасы Германияны 2:1 есебімен сүріндірді.

Ұлттар лигасы 2018 жылдан бері тұрақты түрде өткізіліп келеді. Қазірге дейін Португалия, Франция, Испания құрамалары чемпион атанды.

Айта кетсек, Қазақстан құрамасы 2024 жылы Ұлттар лигасында В дивизионында үшінші топта Норвегия, Словения, Аустриямен бақ сынап, төртінші орынды місе тұтты. Салдарынан қайтадан С дивизионына түсіп қалды.