Ыстанбұлдың бұрынғы мэрі бас бостандығынан айырылды

АСТАНА. KAZINFORM – Ыстанбұлдың бұрынғы мэрі Экрем Имамоғлы 1 жыл 8 айға бас бостандығынан айырылды, деп хабарлайды CNN.

Ыстанбұл соты 20 қаңтардағы панельдік пікірталас кезінде Экрем Имамоғлыны Ыстанбұлдың бас прокуроры Акин Гюрлекке және оның отбасына қатысты «қызметтік міндеттерін орындау кезінде шенеунікті көпшілік алдында қорлау» және «қоқан-лоққы көрсету» баптары бойынша кінәлі деп тапты.

Прокурорлар оны осы екі бап бойынша, сондай-ақ «терроризммен күреске қатысқан адамдарды қудалау» бабы бойынша кінәлі деп тануды және 7 жыл 4 айға дейін бас бостандығынан айыруды талап етті.

Алайда сот Экрем Имамоғлыны «терроризммен күреске қатысқан адамдарды қудалады» деген айыпты ақтап, оны 1 жыл, 5 айға және 15 күнге бас бостандығынан айырды. Сонымен қатар «Қызметтік міндеттерін орындау кезінде шенеунікті көпшілік алдында қорлағаны үшін», сондай-ақ «қоқан-лоққысы» үшін 2 ай 15 күнге бас бостандығынан айырды.

Осылайша, Ыстанбұлдың бұрынғы мэрі саяси тыйымсыз жалпы 20 айға бас бостандығынан айырылды.

Естеріңізге сала кетейік, Экрем Имамоғлы наурыз айының соңында ауқымды арнайы операция барысында ұсталды.

Ол ұсталғаннан кейін Түркияның ірі қалаларында жаппай шерулер мен наразылық басталды.