Ыстық суды 30 жыл күткен Қызылордада қанша үйге су келді
ҚЫЗЫЛОРДА. KAZINFORM — Қызылорда тұрғындары отыз жыл бойы ыстық су мәселесін «Аристон» жылытқыш құралы арқылы шешіп келді. Биыл көпқабатты 186 үйге өркениет белгісі жетуі керек. Дегенмен әзірге соның 13-іне ғана су келген. Kazinform осы мәселеге орай тиісті сала мамандарының, тұрғындардың ой-пікірін білген еді.
Бұрын қалай шешілген еді?
Көпшілік арасында «тоқсаныншы жылдарға дейін Қызылорда қаласында ыстық су болды ма?» деген сауал жиі қойылады. Рас, ол кезеңде аталған мәселе ешқандай проблема болған жоқ.
Қайсыбір көпқабатты үйге бара қалсаңыз, құбырдан сарылдап ағып тұрған ыстық суды көруге болатын. Дегенмен тоқсаныншы жылдардан кейін ол қаржы тапшылығына байланысты тоқтап қалды.
Соның салдарынан тұрғындар бұл мәселені түрлі жолмен шешуге тырысты. Жылу құбыры арқылы келетін суды пайдаланған азаматтар кездесті. Ол жарық өшіп қалған сәтте істемейтін. Соның салдарынан үйдегі күнделікті шаруаны атқару тұрғындарға қиынға соқты.
— Әрине, бұл ешқандай талапқа сай келмейтін. Кейіннен аталған заңсыз әрекетке тыйым салынды. Содан бері жергілікті тұрғындар су жылытқыш құралдың жұмысына жүгінуге мәжбүр болды, — дейді «Қызылорда жылу-электр орталығы» МҚК бас инженері Наурыз Сатханов.
Расы керек, аталған мәселені шешу қомақты қаржыны талап ететін еді. Сондықтан оған жергілікті биліктің мүмкіндігі болған жоқ. Бұл проблема облысқа жасаған сапары барысында Мемлекет басшысына айтылып, көпшіліктің өтініші қолдау тапты.
Ыстық сумен жабдықтау жұмысына «Байқоңыр» әлеуметтік-кәсіпкерлік корпорациясы жүзеге асырушы оператор болып бекітілді.
Корпорация мамандарының айтуынша, биыл көпқабатты 186 тұрғын үйге ыстық су жеткізіледі. Бүгінде үйлердің өжіресіне құбырлар толығымен тартылды. Пәтерлерге есептегіш құралдар мен тіреуіштер орнатылып жатыр.
Толығымен дайын болған сол жағалаудағы № 34-ші көпқабатты үй мен «Астана-1» шағынауданындағы көпқабатты 13 үйге ыстық су берілді.
Су жылытқыштан арзанға түседі
Бұл мақсатта Үкімет резервінен биылға 11 млрд теңге бөлінген. Жоба бойынша аталған жұмыс екі кезеңмен жүргізіледі.
Алғашқы кезеңде, яғни биыл 186 үй қамтылса, келесі жылы екінші кезеңде ол 250 үйге жеткізіледі.
Мемлекеттік сатып алу конкурсы нәтижесінде «Мелиратор», «BSG инженеринг» ЖШС-тері және «Көкшетаугидрогеология» АҚ жеңімпаз деп танылған. Қазіргі уақытта мердігер мекемелер тұрғын үйді ыстық сумен жабдықтау жұмыстарын жүргізіп жатыр.
Алдағы уақытта дайын үйлерге ыстық су кезең-кезеңімен қосыла береді. Қала бойынша биылғы жылға жоспарда тұрған тұрғын үйлер жыл соңына дейін толықтай іске қосылады.
Атап айтқанда, пәтер иелері ыстық су жүйесіне қосылғанда тұтынушыларға электрлі су ысытқышқа қарағанда едәуір тиімді болмақ.
— Мәселен, су ысытқыш қондырғысының 50 литр суды ысытуға орта есеппен күніне 2 кВт кетеді деп есептелік. Яғни тұрғындар бұл уақытта орта есеппен 2 текше метр су пайдаланады. Сонда бір айға электрлі ысытқышпен шамамен 1 565,6 теңге төлейді. Ал жылу энергиясы арқылы тариф бойынша 1 текше метр су — 172,03 теңге. Тұтынушы 2 текше метр ыстық суды пайдаланғанда су, кәріз жүйелерін қоса алғанда орташа есеппен шамамен 529,66 теңге болады. Сол арқылы тұтынушы 1035,94 теңгені үнемдей алады. Ол 66,2 пайызға тиімдірек болады. Ыстық су кіргізу әр тұрғынның өз еркінде. Орнатып беру тегін. Желіні жүргізгенде сапасы жоғары материалдар, танымал еуропалық өндірушілердің жабдықтары қолданылады. Бұл ыстық су жүйесінің сенімді және үздіксіз жұмысын қамтамасыз етеді, — дейді «Байқоңыр» әлеуметтік-кәсіпкерлік корпорациясының басқарма төрағасының кеңесшісі Мұхитжан Кәрімбаев.
Көпқабатты үйлерде суық суға да насос қойылуда. Соның арқасында жоғары қабаттарға су көтерілмеу мәселесі оң шешімін таппақ. Құрылғы толығымен автоматтандырылған.
Биыл 200-ге жуық үйді қамтимыз дегенмен неге бүгінде тек оншақты үйге ыстық су келгенін сұрағанымызда корпорация былай деп жауап қатты:
— Негізгі жүйе дайын. Тек шамалы жұмыстармен кезегімен қосылады.
Су жүйесінің артықшылығы бар
Қазіргі заңнама бойынша су тұрғын үйдің жертөлесіне дейін жеткізілуі керек.
Көпқабатты үйлерді ыстық сумен қамтамасыз етудің екі жолы қарастырылған. Алғашқысы ашық түрінде деп айтылады. Бұл бойынша үй жылытуға келіп тұрған суға қосылады.
Екіншісі жабық түрінде деп бағаланады. Ол бройлер арқылы жүргізіледі. Әрбір үйдің жертөлесінде орнатылған бройлер арқылы келіп тұрған суық су ысытылып, пәтерлерге жеткізіледі.
«Астана» шағынауданында үйіне ыстық су келген Нұрлан Әбиев жаңалыққа жаны жадырап, қуанып қалғанын жеткізді.
— Ыстық суды қалағанымызша пайдаланып, рахатын көріп отырмыз. Жүйенің көп артықшылығы бар екенін байқап отырмыз. Судың да сапасы жоғары. Сыртқы температураға байланысты ыстық суды құрылғы өзі реттейді екен. Бұл тұрғындар үшін де тиімді болмақ, — дейді ол.
Айта кетсек, бұдан бұрын елімізде ыстық сумен қамтылмаған жалғыз облыс орталығы Қызылорда екенін жазған едік.
