Израиль барлау қызметінің басшысы Нетаньяхумен келіспеушіліктен кейін отставкаға кетті
АСТАНА. KAZINFORM — Израильдің ішкі барлау қызметінің басшысы отставкаға кететінін мәлімдеді. Бұл шешім 2023 жылғы 7 қазанда ХАМАС тобы ұйымдастырған қанды шабуыл туралы агенттіктің алдын ала ескерту жасай алмағанына байланысты қабылданған, деп хабарлайды Еuronews.com.
Израильдің ішкі барлау қызметі Шин-Бет басшысы Ронен Бар 15 маусымда отставкаға кететінін мәлімдеді. Бұл шешім оның премьер-министр Биньямин Нетаньяхумен арадағы келіспеушіліктерден кейін қабылданды. Өткен айда Нетаньяху оны қызметінен босатуға тырысқан болатын.
Бар бұл туралы дүйсенбі күні Шин-Бет қызметкерлерінің құрметіне арналған еске алу іс-шарасында айтты.
— Көптеген жылдар бойы түрлі майдандарда қызмет атқарып келемін. Бір түні, оңтүстік майданда, аспан төбемізден құлады, — деді ол 2023 жылғы 7 қазандағы лаңкестік әрекетті еске ала отырып. Бұл шабуыл Израильдің оңтүстігінде 1200-ден астам адамның өмірін қиды және Газа секторында ХАМАС-пен соғыстың басталуына себеп болды. — Барлық жүйе істен шықты. Шин-Бет те алдын ала ескерту жасай алмады. Шабуылды тоқтата алмаған барлық тарап қаза тапқандар, жараланғандар, ұрланғандар мен олардың отбасыларының алдында бас иіп, тиісті жауапкершілік алуы тиіс, — деді Бар.
Өткен айда Нетаньяху ХАМАС шабуылына байланысты сенім дағдарысы туындағанын айтып, Барды орнынан алмақ болды. Алайда бұл әрекет ел ішінде үлкен наразылық тудырды. Себебі дәл сол уақытта Шин-Бет премьер-министр кеңсесінің Катармен байланыстарын тексеріп жатқан еді. Катар — ХАМАС пен Израиль арасындағы делдал мемлекет.
Шин-Бет Нетаньяхудың жақын кеңесшілерінің Катардың ақылы кеңесшілері ретінде қызмет етіп жүріп, бір мезгілде премьер-министр кеңсесінде жұмыс істегені туралы айыптауларды зерттеп жатыр. Бұл ретте Нетаньяхудың өзі тергеуге тікелей тартылған жоқ.
Израиль Жоғарғы соты Барды қызметінен босату туралы шешімді уақытша тоқтатты. Сот тараптарды ымыраға келуге шақырды.
Бар дүйсенбідегі сөзінде «Бұл сот ісі менің жеке мәселем емес, болашақ Шин-Бет басшыларының тәуелсіздігіне қатысты» екенін айтты.
Өткен аптада Бар Жоғарғы сотқа Нетаньяхуды Шин-Бет билігін саяси және жеке мүддеге пайдалануға тырысты деп айыптаған құжат ұсынды.
Нетаньяху бұған дейін бірнеше рет «терең мемлекет» — яғни мемлекеттік қызметкерлер мен сайланбайтын судьялар оны биліктен тайдыруға тырысып отыр деп мәлімдеген. Қоғамдық ұйымдар Шин-Бет басшысы тәуелсіз тұлға болуы тиіс екенін айтып, Бардың кетуі премьер-министрдің бұл қызметке өз одақтасын тағайындауына жол ашады деп қауіптеніп отыр.
Шин-Бет палестиналық қарулы топтарды бақылауға жауапты орган. Бар ХАМАС шабуылына жол берілгенін бұған дейін өзі де мойындаған.
Нетаньяху қауіпсіздік құрылымдары мен армияны айыптап, ресми тергеу комиссиясын құру туралы ұсыныстарға қарсы шыққан болатын.
Бар — ХАМАС шабуылынан кейін отставкаға кеткен немесе қызметінен босатылған бірнеше жоғары лауазымды қауіпсіздік қызметі өкілдерінің бірі. Олардың қатарында бұрынғы қорғаныс министрі мен армия басшысы да бар.
Осы айда Нетаньяху Шин-Бет басшысы ретінде бұрынғы Әскери-теңіз күштерінің қолбасшысын тағайындаған еді. Алайда бұл кандидаттың антиүкіметтік наразылықтарға қатысқаны белгілі болған соң, тағайындау 24 сағат өтпей күшін жойды.
Айта кетелік Нетаньяху Газадағы 10 израильдік тұтқынды босатуға ниетті екенін жазған едік.
