Израиль Газадағы әскери операциясын кеңейтті

АСТАНА. KAZINFORM — Израиль қорғаныс министрі Исраэль Кац Газадағы операцияны кеңейтіп, аумақтың «үлкен бөлігін», соның ішінде Израиль армиясы құрған «қауіпсіздік аймақтарын» алатынын айтты, деп хабарлайды ВВС.

Министрдің айтуынша, операцияның кеңеюі «аймақты лаңкестік инфрақұрылымдардан тазартуға және оларды жоюға» бағытталған және палестиналықтарды жаппай эвакуациялауды талап етеді.

Израиль әскерилері оңтүстіктегі Рафах және Хан Юнис қалаларында тұратын Газа тұрғындарына эвакуация туралы ескерту жасап, оларға бұрын гуманитарлық аймақ деп жарияланған әл-Мавасидің жағалау аймағына көшуді бұйырды.

Кац эвакуацияның ұрыс жүріп жатқан аймақтарда болатынын айтып, газалықтарды соғысты тоқтатудың жалғыз жолы ретінде ХАМАС-ты жойып, израильдік кепілге алынғандарды қайтаруға шақырды.

Кац мәлімдемесінде Израильдің нақты қандай аумақты алуды көздеп отырғаны айтылмаған.

Израиль күштері Газада буферлік аймақ құрды, соғысқа дейін анклав шекарасында болған аумақты кеңейтті және Газа орталығы арқылы өтетін Нецарим дәлізіне үлкен қауіпсіздік аймағын қосты.

Жергілікті ауруханалардың хабарлауынша, Газа секторындағы түнгі соққылардан тағы 15 адам қаза тапты.

Палестиналық дереккөздердің хабарлауынша, құтқарушылар Хан Юнистегі үйден 12 адамның, оның ішінде балалар мен әйелдердің мәйітін шығарған.

Израиль 18 наурызда Газаға қайтадан шабуыл жасап, ХАМАС-ты АҚШ-тың атысты тоқтату келісімін ұзарту және Газада ұсталған 59 кепілді босату туралы жаңа ұсынысын қабылдамады деп айыптады.

ХАМАС өз кезегінде Израильді қаңтарда жасалған бастапқы келісімді бұзды деп айыптап отыр.

Осыған дейін Хамас делдалдардың Газа секторында атысты тоқтату туралы ұсынысын қабыл алғаны хабарланды.