Израиль Газадағы ХАМАС нысандарына соққы жасауды жалғастырып отыр
АСТАНА. KAZINFORM – Израиль әскерилері сейсенбіге қараған түні Газа секторын атқылауды жалғастырды. Бұл туралы Израиль қорғаныс күштері мен Шин-Бет қауіпсіздік қызметінің бірлескен мәлімдемесінде айтылған, деп хабарлайды ВВС.
- Саяси эшелонның шешіміне сәйкес, ЦАХАЛ армиясы мен Шин-Бет қазіргі уақытта Газа секторындағы ХАМАС лаңкестік ұйымына тиесілі лаңкестік нысандарға жаппай соққы жасап отыр, - делінген хабарламада.
Израиль премьер-министрі кеңсесінен жасалған мәлімдемеде Беньямин Нетаньяху мен Қорғаныс министрі Исраэль Кац әскерилерге ХАМАС-қа қарсы «шешуші әрекет ету» туралы бұйрық бергені атап өтілген.
- Бұл ХАМАС-тың кепілге алынғандарды босатудан бірнеше рет бас тартқаннан кейін, сондай-ақ АҚШ президентінің арнайы өкілі Стив Уиткофф пен делдалдардан түскен барлық ұсынысты қабылдамаудан кейін болды. Израиль армиясы қазіргі уақытта саяси басшылық белгілеген соғыс мақсаттарына қол жеткізуге, соның ішінде тірі және өлі тұтқындарымызды босату үшін Газа секторындағы ХАМАС лаңкестік ұйымының нысандарына шабуыл жасап отыр, – деп мәлімдеді Нетаньяху кеңсесі.
ХАМАС-тың жоғары лауазымды шенеунігінің Reuters агенттігіне мәлімдеуінше, Израиль 19 қаңтарда басталған атысты тоқтату келісімін біржақты түрде тоқтатып жатыр.
ХАМАС-тың Газадағы бақылауындағы Азаматтық қорғаныс агенттігінің хабарлауынша, Израиль әуе күштерінің бірнеше соққысынан кемінде 20 адам, оның ішінде бес бала қаза тауып, ондаған адам жарақат алды.
- Израильдің Газа секторының аудандарына жасаған бірнеше соққысы салдарынан қаза тапқандар саны 20-дан астам адамға жетті, 70-ке жуық адам жарақат алды, - деп хабарлады агенттік өкілі Махмуд Басал Франс AFP-ға.
Кейін Газадағы дәрігерлер тілшілерге қаза тапқандар саны 60 адамнан асқанын хабарлады. Бұл деректердің дұрыстығын әзірге растау мүмкін емес.
Ақ үйдің баспасөз хатшысы Кэролайн Левитт Fox News эфирінде Израильдің АҚШ әкімшілігіне Газадағы нысандарға соққы беру туралы алдын ала ескерту жасағанын мәлімдеді.
- Президент Трамп анық айтқандай, ХАМАС, хуситтер, Иран, тек Израильді ғана емес, Америка Құрама Штаттарын да үрейлендіргісі келетіндердің бәрі сол үшін жауапқа тартылады, - деді ол.
Қатар, Мысыр және АҚШ делдалдық жасаған бітімгершілік келісімнің бірінші кезеңі ХАМАС Израильге шабуыл жасағаннан кейін басталған Газа секторындағы 15 айдан астам шайқастан соң 19 қаңтарда күшіне енді.
Келісімнің бірінші кезеңі 1 наурызда аяқталды. Осы уақытқа дейін бітімгершіліктің екінші кезеңінің шарттары келісілетіні шамаланған, бірақ бұл болмады.
Өткен аптада Беньямин Нетаньяху кеңсесі Израиль өкілдері Мысырда ел шенеуніктерімен кездесіп, кепілге алынғандарды босату мәселесін талқылап жатқанын мәлімдеді, деп еске салды AFP.
Израильдің Газадағы шабуылдарынан қаза тапқандар саны 48 543-ке жеткенін жазған болатынбыз.
