Израиль Газаны басып алу жоспарын мақұлдады
АСТАНА.KAZINFORM - Израиль Газа секторындағы әскери науқанның ең үлкен кезеңіне дайындалып жатыр. Атап айтқанда, Газа қаласына басып кіру және он резервтегі мыңдаған әскерді жұмылдыру жоспарын бекітті, деп хабарлайды Кazinform агенттігінің меншікті тілшісі.
Израиль қорғаныс министрі Исраэль Кац сейсенбі күні Газа қаласын басып алу бойынша әскери операция жоспарын мақұлдап, резервтегі шамамен 60 мың әскерді шақыруға санкция берді, деп хабарлайды The Times of Israel.
Израиль қорғаныс министрлігінің хабарлауынша, жобалық хаттар алдағы күндері жіберіле бастайды, ал негізгі күштер қыркүйектің басында жұмылдырылады. Шешім Бас штаб бастығы Эял Замир бастаған армия қолбасшылығы жоспарды ұсынғаннан кейін жасалды.
Әскери операция бірнеше кезеңді қамтиды: жолақтың оңтүстігінде гуманитарлық инфрақұрылым құру, Газа тұрғындарын эвакуациялау, қаланы қоршау және құрлықтағы шабуыл.
Жоспарды жүзеге асыру үшін бес дивизия, оның ішінде жаяу, бронды танкті, артиллериялық және инженерлік бөлімшелері бар 14 бригада пайдаланылады.
Израиль әскерилерінің хабарлауынша, аймақтың оңтүстік бөлігінде қосымша көмек тарату пункттері мен далалық ауруханалар орналаса бастады. Хан Юнистегі «Еуропа ауруханасы» ХАМАС туннелі табылғаннан кейін жабылған, енді қайта ашылады деп жоспарланып отыр.
Кац гуманитарлық шаралар әскери қимылдармен бірге жүруі керек екенін атап өтті. Өйткені Израильдің бағалауы бойынша 1 миллионға жуық палестиналық Газа қаласынан кетуге мәжбүр болады.
Палестиналық дәрігерлердің Әл-Жазираға сілтеме жасап берген ақпараты бойынша, сәрсенбі күні таңнан бері Газа секторында кемінде 35 адам қаза болды, оның ішінде гуманитарлық көмек алуға тырысқан 10 бейбіт тұрғын бар.
Сонымен қатар, делдалдар - Мысыр мен Қатар - 60 күндік атысты тоқтату және кейбір кепілге алынған израильдіктерді босату туралы келіссөздерді қайта бастауға әрекет етіп жатыр.
Дүйсенбі күні ХАМАС халықаралық медиаторларға Газа секторында атысты тоқтату туралы жаңа ұсынысты мақұлдайтынын және 60 күндік бітімге келуге дайын екенін айтты. Кейін Израиль ХАМАС-пен бітімге келмейтінін мәлімдеп, кепілге алынғандардың барлығын босатуды талап етті.
