Израиль кепілге алынғандарды босатуды бітімге келу шарты ретінде қарастырмақшы
АСТАНА. KAZINFORM — Тель-Авив атысты тоқтату келісімін ұзартуды қолдайды, бірақ тараптар негізгі мәселелерде, соның ішінде Газа секторының болашағына қатысты келісімге келе алмай отыр, деп хабарлайды Kazinform тілшісі.
Израильдің сыртқы істер министрі Гидеон Саар сейсенбіде өз елінің Газа секторындағы атысты тоқтатудың екінші кезеңіне көшуге дайын екенін айтты. Бұл ретте ол ХАМАС әлі ұстап отырған 59 кепілге алынғандарды босатуға дайын болуы тиіс екенін алға тартты.
Газа секторындағы шайқас 19 қаңтарда АҚШ, Қатар мен Мысыр елдерінің қолдауымен қол жеткен бітімнің арқасында аяқталды. ХАМАС 33 израильдік пен Тайландтың бес азаматын 2000-ға жуық палестиналық тұтқынға айырбастады.
Алайда, алғашқы 42 күндік бітімгершілік кезеңі 1 наурызда аяқталды, ал ХАМАС пен Израиль соғыстан кейінгі Газаны басқару және ХАМАС тобының болашағы сынды жалпы мәселелер бойынша келісімнен әлі де алыс.
— Біз екінші кезеңге өтуге дайынбыз, — деді Саар Иерусалимде. — Бірақ уақытты ұзарту үшін бізге кепілге алынған көптеген адамды босату туралы келісім қажет.
Израиль СІМ басшысы палестиналық әскерилендірілген топты Израильмен күресті жалғастыру үшін көмек қолданды деп айыптап, бұл әрі қарай жалғаса алмайтынын айтты.
ХАМАС келіссөздердің екінші кезеңіне өтуді қалайтынын айтады. Бұл Израиль әскерлерінің Палестина анклавынан толық шығарылуымен және 2023 жылдың 7 қазанында Израильге жасалған шабуылда тұтқынға алынған қалған 59 тұтқынның оралуымен соғыстың түпкілікті аяқталуына жол ашуы мүмкін.
Бірақ Израиль бітімгершілікті ұзарту үшін кепілге алынған адамдарды көбірек беру керек дейді. Тель-Авив АҚШ президенті Дональд Трамптың Таяу Шығыстағы Арнайы Өкілі Стивен Уиткофф ұсынған жоспарды қолдайды, ол атысты тоқтату режимін мұсылмандардың наурыздағы Рамазан айына дейін және 20 сәуірде аяқталатын еврейлердің песах мейрамы аяқталғанға дейін ұзартуды қарастырады.
Израиль үкіметінің өкілі Омер Достри сейсенбі күні Израиль ХАМАС-тың Уиткофф алға тартқан ұсынысына келісуі үшін «бірнеше күн» бөліп жатқанын айтты.
— Егер жоқ деген жауап алсақ, кабинет жиналып, келесі қадамға көшу туралы шешім қабылдайды, — деп қорқытты Достри.
Өткен аптада Мемлекеттік департамент Уиткофф алдағы бірнеше күнде атысты тоқтату режимін ұзартуды немесе екінші кезеңге өтуді талқылау үшін Таяу Шығыс аймағына баруы керек деп хабарлады.
Келесі күні ХАМАС Израильді екінші кезеңдегі келіссөздердің басталуын кешіктірді деп айыптады. Кейінірек Израиль Газа секторына гуманитарлық көмек пен жүк көліктерінің кіруіне тосқауыл қойды. Сондай-ақ, ол анклавтағы электр қуатын өшіріп, ХАМАС-қа қысымның күшеюі аясында соғысты қайта бастауы мүмкін екендігі туралы хабарлады.
