Израиль «Палестиналық ислам жиһадының» Сириядағы командалық пунктіне соққы жасады

АСТАНА. KAZINFORM – Израиль әуе күштері Дамаскіге соққы жасады. ЦАХАЛ нысана Палестинадағы «Ислам жиһады» командалық пункті екенін айтты, деп хабарлайды Euronews. 

Израиль қорғаныс министрінің мәлімдеуінше, бейсенбі күні лаңкестікке қарсы операция аясында Израильдің жойғыш ұшақтары Дамаскіге әуеден соққы жасады.

- Біздің жауынгерлік ұшағымыз Израильге қарсы лаңкестік әрекет жоспарланған кез келген жерде пайда болады, - деп уәде берді Исраэль Кац.

Сириялық БАҚ-тың хабарлауынша, мәселе Дамаскінің шетіндегі Дамар тұрғын үй кешеніндегі көпқабатты үйге бағытталған мақсатты соққы туралы болды. Шабуыл болған жерде қалың түтін көрініп тұр. Хабарланғандай, кем дегенде бір адам қаза тауып, бірнеше адам жарақат алған.

ЦАХАЛ кейінірек соққының нысанасы «Палестиналық ислам жиһадының» командалық пункті болғанын нақтылады.

- ЦАХАЛ лаңкестік ұйымдардың Сирия аумағында бекініп, Израиль мемлекетіне қарсы әрекет етуіне жол бермейді және кез келген мұндай әрекетке батыл жауап береді, - делінген Израиль Қорғаныс армиясының мәлімдемесінде.

Дамаскінің шетіндегі командалық орталық «Палестиналық ислам жиһадының» Израиль мемлекетіне қарсы лаңкестік әрекеттерін жоспарлау және бағыттау үшін пайдаланылған, делінген хабарламада.

Осыған дейін Израиль әуе күштерінің Дамасктің оңтүстігіне соққы жасағаны туралы жаздық.